ئەمشەو، دووشەممە لە چوارچێوەی ڕوبەڕوبوونەوەکانی هەفتەی 17ی خولی نایابی ئینگلیزی، یانەی ساوزامپتن بردنەوەیەکی چاوەڕواننەکراوی بەرانبەر لیڤەرپوڵ تۆمارکرد.
ساوزامپتن لە سانت ماریز ستادیەم میوانداری لیڤەرپوڵی کرد و یاری نێوانیان بە ئەنجامی گۆڵێکی بێوەڵام لە بەرژەوەندی یانەی خانەخوێ کۆتاییهات.
گۆڵەکە لە خولەکی دوو و لەگەڵ دەستپێکی یاری بە شێوەیەکی هونەری ناوازە لەلایەن دانی ئینگزەوە تۆمارکرا.
دۆڕاندنی ئەستێرەکانی “ڕێدز” دوای ئەوەدێت کە لە دوو ڕوبەڕوبوونەوەی ڕابردوو بەرانبەر یانەکانی وێست برۆمیچ و نیوکاسڵ یەکسانبوونیان تۆمارکرد و چوار خاڵیان لە ڕیزبەندی یانەکانی پریمەرلیگ لەدەستدا، ئەوەش یۆرگن کلۆپی ڕاهێنەری ئەڵمانی ڕوبەڕوی ڕەخنەی توند دەکاتەوە، بەوپێیەی لە سێ ڕوبەڕوبوونەوەدا حەوت خاڵی لەدەستداوە و دووەم دۆڕاندنە لەم وەرزەدا و چانسی بەخشیوە بە یانەی مانچستەر یونایتد لوتکەی خولەکە بگرێتەوە.
بەپێی ئەنجامە تۆمارکراوەکە، یانەی لیڤەرپوڵ لەکۆی 17 یاری ئەم وەرزە (2020/2021) ژمارەی خاڵەکانی لە 33دا وەستایەوە و لە پلەی یەکەمی ڕیزبەندی پریمەرلیگ بەردەوامبوو، بەڵام چانسێکی گەورەی بە یانەی مانچستەر یونایتد بەخشی بە جیاوازی سێ خاڵ لوتکە بگرێتەوە، چونکە هەردوو یانە بە 33 خاڵ یەکسانن و یونایتد یارییەکی کەمتری ئەنجامداوە، لەبەرانبەردا یانەی ساوزامپتن بە 29 خاڵەوە لە پلەی نۆیەمەوە بۆ شەشەمی ڕیزبەندی سەرکەوت.
