سەرۆک وەزیرانی عێراق، جەختیلەوە کردەوە، حکومەت بەرنامەیەکی دەستپێکردووە کە دیدگایەک بۆ داهاتووی عێراقێکی یەکگرتوو لەخۆدەگرێت، هاوکات رێچکەی چاکسازی ریشەیی پەیڕەوکردووە بۆ رووبەڕووبوونەوەی بەفیڕۆدانی سامانی گشتییە.
لەمیانەی بەشداریکردن لە رێوڕەسمی شەهیدانی میحراب، محەمەد شیاع سودانی، سەرۆک وەزیرانی عێراق ئاماژەی بەوەکرد، “حکومەت دەستیکردووە بە بەرنامەیەک کە دیدگایەک بۆ داهاتووی عێراقێکی یەکگرتوو و بەهێز و سەربەخۆ و سەقامگیر و ئاوەدان لەخۆدەگرێت”.
دەشڵێت، “رێبازی چاکسازی ریشەییمان پەیڕەوکرد کە چارەسەری کێشە درێژخایەنەکان دەکات و ئامانجمان رووبەڕووبوونەوەی بەفیڕۆدانی سامانی گشتییە، هاوکات ژێرخانی ئابوری و بانکی و خزمەتگوزارییەکانمان لەبەرچاو گرتووە بۆ هەنگاونان بەرەو گەشەپێدان و رەخساندنی دەرفەت بۆ نەوەکانی ئێستا و داهاتوو”.
