بەرپرسی مەڵبەندی هەولێری یەكێتی لە وەڵامی كاربەدەستێكی پارتیدا دەڵێت، خەڵک ئامادەنییە متمانە بە هێزێک بکات کە تەنها کاریان چەوساندنەوە و نەدانی مووچە بێت.
مەجید حەمەدەمین، لێپرسراوی مەڵبەندی سێی هەولێری یەكێتیی نیشتمانیی كوردستان رایگەیاند، دوابەدوای راگەیاندنی ئەنجامی هەڵبژاردنی ئەنجومەنی پارێزگاکان، وەک یەکێتی چاوەڕوان بووین سەرجەم هێز و لایەنە کوردستانییەکان بەیەکەوە گفتوگۆ بکەین بۆ بەشداری لە حکومەتە خۆجێیەکان، بەڵام بەداخەوە لەئێستاوە چەند دەنگێکی نەشاز دەبیسترێن و دەیانەوێ ئەنجامی هەڵبژاردنەکان بە ئاقارێکی دیكەدا ببەن و خەڵکی کوردستان چەواشە بکەن.
لێپرسراوی مەڵبەندی سێی هەولێری یەكێتی لە راگەیەندراوێكدا وەڵامی نووسینێكی مەریوان قەرەنی جێگری سەرۆکی فراکسیۆنی پارتی لە بەغداد دەداتەوە و بە “دەنگێکی یەکجار ناشاز” ناویدەبات كە “چەندین جارە دەیەوێ بە قسەی بێ بنەما شکستەکانی خۆیان پەردەپۆش بکەن”.
دەشڵێت، ئەنجامی دەنگەکان سەلماندی کە قەبارەی یەکێتی لە کەرکوک و سەرجەم ناوچە کوردستانییەکان چەندە گەورەیە و خەڵکی دیكەش قەبارەیان چەندە. دووپاتیشیدەكاتەوە، “ئێمە باش دەزانین کاک مەریوان و حزبەکەی ترسیان لە هەڵبژاردنی پەرلەمانی کوردستانە و ئەم شکستەی ئەوان و سەرکەوتنەی یەکێتی سەرەتای قۆناغێکی نوێیە کە دووبارە کوردستانیان متمانە بەو هێزە دەبەخشنەوە کە شۆڕشی هەڵگیرساندەوە و راپەڕینی ئەنجامدا”.
مەجید حەمەدەمین ئەوەشی خستەڕوو، لەوەش باش تێدەگەن کە مەریوان قەرەنی و هاوئاوازەکانیان دەیانەوێ دەستی چەوری شکستی خۆیان بە خەڵکی دیكە بسڕنەوە و بوختان دروستبکەن، ئەگەرنا خۆیان باش دەزانن بەرهەمی حوکمڕانی و خەڵک چەوساندنەوەکەیان هەر ئەم شکستانەیە و چیتر خەڵک ئامادەنییە متمانە بە هێزێک بکات کە تەنها کاریان تەخوینکردنی بەرامبەر و چەوساندنەوە و نەدانی مووچە بێت.
لەکۆتاییدا هیوا دەخوازێت چیتر كاربەدەستانی پارتی “کورد و کوردستان نەکەنە قوربانی عینادی خۆیان، واباشترە کاک مەریوان لەبری ئەم قسە سواوانە خەمێک لە حزبەکەی بخوا و لەخۆیان بپرسێ ئەرێ بۆ خەڵک ئێمەی ناوێت”.
