پارێزگای هەولێر رایدەگەیەنێت، ئەو كچە بیانیەی دەڵێت لە شێڵتەری سەگی بێلانە دەركراوە، ئەو كچە وشەی نەشیاوی بەرامبەر كارمەندەكان بەكارهێناوە و بە ناوی هاوسەرەكەیەوە ویستوویەتی كاری سەربەخۆ لە شێڵتەرەكە ئەنجامبدات.
ئومێد خۆشناو پارێزگای هەولێر راگەیەندراوێكی بڵاوكردەوە و دەڵێت، “چەند رۆژیك لەمەوبەر ئافرەتێكی بیانی، سەردانی بەرێوەبەرایەتیی خزمەتگوزاریی ژینگەپارێزیی هەولێری كرد و ئامادەیی خۆی دەربڕی كە بە تیمی خۆبەخش و دابینكردنی دەرمان هاوكاری شێڵتەری سەگی بێلانەی هەولێر بكات، وەكو بەرێوەبەرایەتی فەرمانگەی ژینگە پارێزی هەولێر، داواكاریەكەمان قبووڵكرد.
هەر لە راگەیەندراوەكەدا هاتووە، دوێنێ سێشەممە داوای چوونە ژورەوەی شێڵتەری كرد و ڕەزامەندی پێدرا، ئەمڕۆ چوارشەممە بڕیار بوو برێك دەرمان ببات وەك یارمەتی بۆ شێڵتەر، بەڵام بەداخەوە لەكاتی چوونە ژوورەوەی بە وشەی نەشیاو بێڕێزیەكی زۆری بەرامبەر بە ستافی شێڵتەر و پزیشكانی ڤێتێرنەری كردوە كە تەمەنێكی زۆریان هەیە لەو بوارەدا.
دەشڵێت، “سەرباری ئەوەش خۆی وانیشانداوە كە بەهۆی پاڵپشتی هاوسەرەكەیەوە دەتوانێت هەر كار و رەفتارێك ئارەزوو بكات ئەنجامی بدات، لەگەڵ دوز كەسی دیكە كە هاوكاری بوون خۆیان تێكەڵ بە هەندێك بابەت كردووە كە دوور و نزیك پەیوەندی بە ئەوانەوە نییە.
