دەستەی گشتیی ناوچە كوردستانییەكانی دەرەوەی ئیدارەی هەرێم، بەبۆنەی سەركەوتنی هەڵبژاردن و بەشداریی كاریگەری دانیشتووان و كوردانی ناوچە كوردستانییەكان و بەدەستهێنانی ڕێژەیەكی باشی دەنگ و كورسی لە ئەنجومەنی پارێزگاكانی عێراق پیرۆزبایی لە هاوڵاتییان دەكات و رایدەگەیەنێت، “ئەم ئەنجامانە كوردستانیی بوونی ناوچەكان جارێكی تر كرد بە راستی و هیچ دەرفەتێكی لە بەردەم ئەو جۆرە بیركردنەوە و عەقڵە شۆڤێنییانە نەهێشتەوە كە هەمیشە بەپلان و ئەجنێدای جیاوازەوە لە هەوڵی تێكدانی ناسنامەی كوردستانیی بوونی ئەو ناوچانەدابوون”.
دەقی پەیامەكە…
راگەیەنراوێك لە دەستەی گشتی ناوچە كوردستانییەكانی دەرەوەی ئیدارەی هەرێم ..
بەبۆنەی سەركەوتنی هەڵبژاردن و بەشداریی كاریگەری دانیشتوان و كوردانی ناوچە كوردستانییەكان و بەدەستهێنانی ڕێژەیەكی باشی دەنگ و كورسی لە ئەنجوومەنی پارێزگاكانی عێراق، پیرۆزبایی گەرمتان لێ دەكەین، ئەم ئەنجامانە كوردستانیی بوونی ناوچەكانی جارێكی تر كرد بە ڕاستی و هیچ دەرفەتێكی لە بەردەم ئەو جۆرە بیركردنەوە و عەقڵە شۆڤێنییانە نەهێشتەوە كە هەمیشە بەپلان و ئەجندای جیاوازەوە لە هەوڵی تێكدانی ناسنامەی كوردستانیی بوونی ئەو ناوچانەدابوون، ئێمە لە دوای دەرئەنجامەكانی هەڵبژاردن بە ئومێدێكی زۆرەوە چاوەڕوانی داهاتووی باشترین بۆ ناوچە كوردستانییەكانی دەرەوەی ئیدارەی هەرێم دەكەین و هیوادارین سەركردایەتی سیاسی كوردستانیش بە دیدی هاوبەش و كاری پێكەوەیی خەبات بكەن لە پێناو پێكهێنانی حكومەتی خۆ جێیی لە تەوای ناوچەكان و بەیەكگرتوویی و خیتابێكی كوردستانی، هەروەها هەنگاوەكانی داهاتوویان بینا بكەن، هیواخوازین ئەم ئەنجامانە كۆتایی بە تەعریبی نوێ و داگیركاری ناڕەوا بهێنێت و جارێكی تر پیرۆزبایی گەرمتان لێدەكەین و ناسنامەی كوردستانیی بوونی خۆتان لە وەهمی داگیركەرانەوە گۆڕی بۆ ڕاستی مێژوویی و نەخشەی كوردستانتان بە ئامانەتەوە بردەوە چیای حەمرین.
دەستەی گشتی ناوچە كوردستانییەكانی دەرەوەی ئیدارەی هەرێم
