وه‌زیری پێشمه‌رگه‌: بەعەرەبکردنی ناوچه‌ كوردستانییه‌كان قبوڵكراو نییە

وه‌زیری پێشمه‌رگه‌ی كوردستان دەڵێت، “بەعەرەبکردن و کۆچی زۆرەملێی دانیشتووانی ناوچه‌  كوردستانییه‌كانی ده‌ره‌وه‌ی ئیداره‌ی هه‌رێم قبوڵكراو نییه ‌و ڕه‌تیده‌كه‌ینه‌وە.”

شۆڕش ئیسماعیل، وه‌زیری پێشمه‌رگه‌ی حكومه‌تی هه‌رێمی كوردستان، ئه‌مڕۆ سێشەممە 12ی كانونی دووەم له‌گه‌ڵ تۆم هاید، به‌رپرسی كاروباری سیاسی بۆ ناوچه‌ جێناكۆكان له‌ كونسوڵخانه‌ی به‌ریتانیا و شاندێكی یاوه‌ری له‌ هه‌ولێر كۆبووەوە.

وه‌زیری پێشمه‌رگه‌ رایگه‌یاند، “ئه‌قڵیه‌تی شۆڤێنیی هه‌ندێ كه‌س و لایه‌ن وایكردووه‌،‌  پڕۆسه‌ی بەعەرەبکردن و کۆچی زۆرەملێی دانیشتوانی ناوچه‌ كوردستانیه‌كانی ده‌ره‌وه‌ی ئیداره‌ی هه‌رێم به‌شێوه‌یه‌كی مه‌ترسیدار ده‌ستیپێکردووە، ئه‌مه‌شمان گه‌یاندووەته‌ به‌رپرسانی سوپای عێراق له‌و ناوچانه‌دا، كه‌ رێگربن و رێگه‌ نه‌ده‌ن به‌ كار و كرده‌وه‌ی لەو ‌جۆره‌ بەردەوام بێت.”

به‌رپرسی كاروباری سیاسی له‌ كونسوڵخانه‌ی به‌ریتانیا، ئاماژه‌ی بۆ ئه‌وه ‌كرد، له‌ خراپیی دۆخی كوردنیشینانی ناوچه‌ كوردستانییه‌كانی ده‌ره‌وه‌ی هه‌رێم ئاگادارن و ده‌یانه‌وێت رۆڵی خۆیان ببینن له ‌هێوركردنه‌وه‌ی دۆخه‌كه‌ و پاراستنی ئارامی و پێكه‌وه‌ژیانی گه‌لان له‌و ناوچانه‌دا.

وه‌زیری پێشمه‌رگه وتیشی: “بە پێی دەستووری عێراق، نابێ و ناکرێ سوپای نوێی عیراق لایەنداری و دەستوەردان لەم پرسەدا بکات.”

داواشیکرد، “بەریتانیا هاوشان لەگەڵ رێکخراوە نێودەوڵەتیەکانی مافی مرۆڤ رۆڵی خۆیان بگێڕن لە ڕاگرتنی ئەو زوڵم و ستەمەی لە دانیشتووانی ئەو ناوچانە دەکرێت، کە پەیوەندیی برایەتی و پێکەوەژیانی لەمێژینەی نەتەوە و پێکهاتە جیاجیاکانی ئەو ناوچانە دەخاتە مەترسییەوە.”

بابەتی پێشتر

بڕیاردرا كارتی بایۆمەتری دەنگدان وەك بەڵگەنامەیەكی فەرمی كاری پێ بكرێت

بابەتی دواتر

لەنێوانیاندا سێ كورد هەیە.. ئەمریكا سزای بەسەر پێنج كەسدا سەپاند

بابەتی پەیوەندیدار
Total
1
Share