قوباد تاڵەبانی: خوێنی شەهیدانی خێڵی حەمە بوو بە نەفرەت بۆ تیرۆریستان

قوباد تاڵەبانی جێگری سەرۆكی ئەنجومەنی وەزیرانی هەرێمی كوردستان

قوباد تاڵەبانی، جێگری سەرۆكی ئەنجومەنی وەزیرانی هەرێمی كوردستان، پەیامێكی لە ساڵیادی “شەهیدانی خێڵی حەمە”دا ئاراستەی كەسوكاری شەهیدان و پێشمەرگە و خەڵكی كوردستان كرد.

لە پەیامەكەیدا قوباد تاڵەبانی دەڵێت، “لەم ڕۆژە پڕ لە ماتەمەدا یاد و یادەوەریی ئەو قارەمانانە بەرزڕادەگرین و سەری ڕێز بۆ گیانفیدایی و ئازایەتی و قورباندانیان نەوی دەكەین”.

ڕاشیگەیاندووە، “ئەو شەهیدانە و سەرجەم شەهیدانی تری ڕێگای ڕزگاریی كوردستان و شەهیدانی نەبەردییەكانی دژەداعش، خاوەن چاكەی هەرە گەورەن لە زامنكردنی ژیانێكی ئازاد و ئارام بۆ خەڵكی كوردستان”.

جێگری سەرۆكی ئەنجومەنی وەزیران، جەختدەكاتەوە كە “هەمووكات هەرچییەكیشمان پێبكرێت بۆ كەسوكاری شەهیدان بەئەركی لەپێشینەی سەرشانی خۆمانی دەزانین”.

دەقی پەیامەكە:-

بە‌ڕێزان كەسوكاری سە‌ربە‌رزی شەهیدانی خێڵی حەمە

جارێكیتر ساڵیادی پڕ سوێی شەهیدبوونی پۆلێك پێشمەرگەی قارەمان لە خێڵی حەمە هاتەوە، لەم ڕۆژە پڕ لە ماتەمەدا یاد و یادەوەریی ئەو قارەمانانە بەرزڕادەگرین و سەری ڕێز بۆ گیانفیدایی و ئازایەتی و قورباندانیان نەوی دەكەین.

خوێنی شەهیدانی خیڵی حەمە بوو بە نەفرەت بۆ تیرۆر و تیرۆریستان و زیاتر دڕندەیی و قێزەونیی ئەوانی لەبەرچاوی دنیا دەرخستن، هەرچەندە ئەو كارەساتە هەمیشە لە ناخ و ویژدانماندا زیندووە و بەتێپبەڕبوونی كات كۆن نابێت، بەڵام ئاسوودەین بەوەی تیرۆریستان و تاوانباران لە كوردستاندا ڕیشەكێشكران و بە یارمەتیی دۆستان و هاوپەیمانان و بە بازووی هێزی پێشمەرگە قارەمانەكان كێوماڵكران.

ئەو شەهیدانە و سەرجەم شەهیدانی تری ڕێگای ڕزگاریی كوردستان و شەهیدانی نەبەردییەكانی دژەداعش، خاوەن چاكەی هەرە گەورەن لە زامنكردنی ژیانێكی ئازاد و ئارام بۆ خەڵكی كوردستان و بۆ ئەزموونە حوكمڕانییەكەی كە خەونی مێژوویی ملیۆنەها كوردە لە سەرانسەری جیهان، لەئێستاشدا ئێمە دەمانەوێت بەیەكڕیزیی زیاتر پێگەی هەرێم بەهێزتربکەین لە چوارچێوەی دەوڵەتی فرەچەشن و فیدراڵی عێراقدا.

لە ساڵیادی خەمناكی شەهیدانی خێڵی حەمەدا دروود بۆ ڕۆحی پاكی سەرجەم شەهیدانی كوردستان دەنێرین و بەشداریی ماتەم و فرمێسكی خێزان و كەسوكارە سەربەرزەكانیانین. هەمووكات هەرچییەكیشمان پێبكرێت بۆ كەسوكاری شەهیدان بەئەركی لەپێشینەی سەرشانی خۆمانی دەزانین.

قوباد تاڵەبانی
جێگری سەرۆكی ئەنجومەنی وەزیران

بابەتی پێشتر

دادگای دهۆك سزای یەك ساڵ زیندانیی بەسەر ئومێد بەرۆشكی-دا سەپاند

بابەتی دواتر

بەنزینەكەی بەغداد 50 دیناری لە نرخی بەنزین كەمكردەوە

بابەتی پەیوەندیدار
Total
18
Share