كەمێك پێش ئێستا دەنگدانی تایبەت بۆ هەڵبژاردنی ئەنجومەنی پارێزگاكان لە عێراق و هەرێمی كوردستان كۆتاییهات و بەپێی زانیارییەكان پڕۆسەكە بە شێوەیەكی سەركەوتووانە بەڕێوەچوو.
لە كاتژمێر 7ی بەیانیی ئەمڕۆوە دەنگدانی تایبەت بۆ هەڵبژاردنی ئەنجومەنی پارێزگاكان، لە سەرجەم پارێزگاكانی عێراق دەستیپێكرد، لەم هەڵبژاردنەدا كارمەندانی هێزە ئەمنییەكان و ئاوارەبووان مافی دەنگدان و بەشداریكردنیان هەیە.
جومانە غەلای وتەبێژی كۆمسیۆنی باڵای سەربەخۆی هەڵبژاردنەكان لە عێراق رایگەیاند، ئەنجامی دەنگدانی تایبەت 24 كاتژمێر دوای دەنگدانی گشتی كە ئەنجامی دەنگدانی تایبەت و گشتی پێكەوە رادەگەیەنرێت.
بەپێی زانیارییەكان، سەرەتا دەنگەكان لە رێگای سیستمی ئەلیكترۆنییەوە دەگەڕێتەوە بەغداد و دواتر دەستدەكرێت بە جیاكردنەوە و ژماردنی دەنگەكان كە لە عێراق و هەرێمی كوردستان 565 بنكە و 2367 وێستگە هەبوون.
