مەکتەبی سیاسیی یەکێتیی نیشتمانیی کوردستان پەیامێکی بەبۆنەی ساڵیادی کۆچی دوایی سەرۆک مام جەلال بڵاوکردەوە.
دەقی پەیامەکەی مەکتەبی سیاسیی یەکێتی:
هەشت ساڵ لەمەوبەر، کوردستان، رابەرێکی مەزن و مێژوویی، تێکۆشەر و پێشمەرگەی زیاتر لە 60 ساڵ خەباتی رزگاریخوازی کوردستانی و عێراقی دیموکرات و فیدراڵیش، یەکەمین سەرۆک کۆماری هەڵبژێردراوی لەدەستدا و بەرەو دوا مەنزڵی نەمریی، بەڕێکرد.
کۆچی دوایی سەرۆک مام جەلال، سەرتاسەری کوردستان، عێراق، ناوچەکە، دونیای دیموکرات و ئاشتیخوازانی جیهانی خەمبار و نیگەران کرد.
سەرۆک مام جەلال مێژوویەکی پڕشنگداری بۆ گەلی کوردستان، بۆ خەباتی دیموکراتی و مافخوازی و دادپەروەری لە سەرتاسەری رۆژهەڵاتی ناوەڕاست تۆمارکرد، کە هەر لە نەوجەوانی و لاوێتییەوە، تا دوا ماڵئاوایی یەکجارەکی، بێوچان خەباتی هەمەلایەنەی فیکری، رێکخراوەیی، سیاسیی، جەماوەری و پێشمەرگایەتیی بەرپاکرد بۆ بەدیهێنانی مافە رەواکانی گەلی کوردستان و پیادەکردنی بژاردەی فیدراڵی، دیموکراسی، دادپەروەری و پێکەوەژیان لە عێراقی فرە پێکهاتەدا.
لە تێکۆشانی شۆڕشگێڕی و پێشمەرگایەتیدا، مام جەلال نمونەی گەورە و باڵای رابەری کۆڵنەدەر، وردبین، ورەبەرز و پتەو بوو، خاوەنی ئەزموونێکی قوڵی رێبەرایەتیی شۆڕشی درێژخایەن بوو، لەو تۆمارە سەربەرزەدا، بە نووسین و ئەدەبیاتی دەوڵەمەندی کوردایەتی و بە رێکخستن و سازدان و رێبەرایەتیی دەستەجەمعی، قەت درێغیی نەکرد، وەک باوەڕبوون بە شێوازی خەباتی هەمەلایەنەی سیاسیی فرەڕەهەندیش، توانایەکی بێوێنەی لە دانوستاندنی سیاسیی و دیپلۆماسیدا هەبوو، کە پەیتاپەیتا رەوایی مەسەلەی کوردی لە دونیا جێگیرتردەکرد.
لەمەشدا، وێستگەکانی خەباتەکەی، بەتایبەتی لە هەڵگیرسانی شۆڕشی نوێی گەلەکەمان، بە رابەرایەتیی یەکێتیی نیشتمانیی کوردستان؛ لە نەبەردی و قوربانیدان و بەرەنگاریی ئاڵۆزی و تەنگژەکان، سەلمێنەرێکی بەرجەستەی ئەم راستییانەیە، لە کاتی دژواری بەرەنگاربوونەوەی جینۆسایدی هەڵەبجە و ئەنفالدا کە بەسەر گەلەکەماندا هات، سەرۆک مام جەلال لە بەرنامەڕێژی بۆ ئەگەرەکانی گۆڕانکاری لە ناوچەکە و ئاراستەکردنی راپەرینی ئاداری 1991ـدا، رۆڵێکی بەرچاوی رێبەری و پێشبینیی داهاتووی هەبوو.
لەپاش راپەڕین و لە قۆناغی خەباتی مەدەنی و دیپلۆماتیشدا، وێنەی مام جەلال لە مێژووی کوردایەتیی هاوچەرخ و هەتا خەباتی ئازادیخوازانەی گەلانی ناوچەکەشدا درەوشاوە و دەگمەنە؛ پەیوەندییەکانی لە ئاستی حکومەت و میللەتانی رۆژهەڵات و دنیای عەرەبی و رۆژئاوادا، بناغەی پتەوی ئەو دەستکەوتە دیپلۆماتییانە بوون کە رەسەنایەتیبوونی کوردی لە رۆژهەڵاتی ناوەڕاست دووپاتدەکردەوە.
تێکۆشانی درێژمەودای تەمەنی پڕ بەرەکەتی مام جەلال، هەمیشە لەسەر دیدگەی پتەوی دیموکراتیزەکردنی وڵات و مسۆگەرکردنی ویستە نەتەوەییەکانی گەلی کورد بیناکرابوو، بۆیە سەرەنجام هەر ئەو نەخشەڕێگە دیموکراتییە فرەییە سەرکەوت، کە نەخشەڕێگەی عێراقێکی دیموکرات و فیدراڵیی بوو.
لە دوا وێستگەی ژیانی سیاسیشیدا وەکو سەرۆک کۆمار، لە پێگەی پارێزەری دەستوورەوە، لەپێناوی نزیککردنەوەی لایەنە سیاسییەکان و پێکهاتەکان و چەسپاندنی سازان و تەبایی نێوانیاندا، هەمیشە خاڵی کۆکەرەوە و راگرتنی هاوسەنگی بوو، هەر بۆیە بە (صەمام امان)ـی عێراق، ناوزەندکرا.
لە سیاسەتی جیهانیشدا مام جەلال وەک فیگەرێکی دیاری سۆشیالیست دیموکرات، بە ناونیشانی جێگری سەرۆکی رێکخراوی سۆشیال ئینتەرناسیۆنال، بەشدارێکی کارابوو لە خولیای چارەسەری پرسەکانی دیموکراتی، عەدالەت و یەکسانی، ژینگەپارێزی و دیالۆگ و ئاشتیی جیهانیدا.
ئەمڕۆش یەکێتیی نیشتمانیی کوردستان، بە سەرۆکایەتیی هەڤاڵ بافڵ جەلال تاڵەبانی، بە پێداگری لەسەر چارەسەری کێشەکانی نێوان هەرێم و بەغداد، لە ناونیشیاندا، پرسی مووچە، ئەو سیاسەتە حەکیمانەیەی سەرۆک مام جەلال دووپات و پەیڕەودەکاتەوە، کە کەلتورێکی کەڵەگەتە لە خزمەتی هەموو سیاسەتی کوردستانیی و عێراقیی.
ئەمڕۆ، بە رەچاوکردنی پێدراوە تازەکانی وڵات و ناوچەکەش، کە روومان لە هەڵبژاردنی ئەنجومەنی نوێنەرانی عێراقە، هەموو هەوڵمان بە ئاراستەی راستکردنەوەی رێڕەوی حوکمڕانی و چاکسازیی ژیرانەیە، کە ئەزموونەکەمان بپارێزێ و پەرەپێبدات.
هەر لەم یادەشدا، رژدین لەسەر ئەولەویەتی مووچە و ژیانی خەڵکەکەی خۆمان بۆ ئەوەی لە پێگەی ژیان و گوزەرانێکی جێگیر و باشترەوە، گەلەکەمان بۆ ئەرکەکانی دیکەی خەباتی نەتەوەیی و نیشتمانی و شایستە دەستوورییەکانی تر، بە ماددەی 140ـی دەستووریشەوە، سازبدەین.
لە کۆتاییدا؛ سڵاو لە رۆحی پاکی رابەر و سەرۆکی مێژووییمان مام جەلال
نەمری بۆ هەموو شەهیدانی یەکێتی و گەلی کوردستان
