ئەو هەڵبژاردنەی بڕیارە مانگی داهاتوو بۆ ئەنجومەنی پارێزگاكانی عێراق ئەنجامبدرێت، بۆ كورد لە كەركوك هەڵبژاردنی چارەنووس و چەسپاندنی پێگەیە، شارەزایەكی بوارەكەش بە گرنگترین هەڵبژاردن بۆ كورد ناویدەبات.
رۆژی 18ی كانونی یەكەمی 2023 هەڵبژاردنی ئەنجومەنی پارێزگاکانی عێراق بەڕێوەدەچێت، لە كەركوك پێنج لیستی كوردی، چوار لیستی عەرەبی و سێ لیستی توركمانی کێبڕکێ لەسەر 16 كورسی ئەنجومەنی پارێزگا دەكەن.
لەگەڵ ئەوەی نزیکەی 18 ساڵە هەڵبژاردن لە کەرکوک ئەنجام نەدراوە و یەك لیستیی كورد كە دەیتوانی زامنی پێگەكەی بكات، سەرەڕای هەوڵەكان نەهاتەدی، كورد بە چەند لیستێك بەشداری دەكات و هەوڵەکانی دروستكردنی هاوپەیمانی تەنها لەنێوان یەكێتیی نیشتمانیی كوردستان و حزبی شیوعیی كوردستاندا گەیشتە ئەنجام بە پێكهێنانی هاوپەیمانیی (كەركوك هێز و ئیرادەمانە) كە ژمارەكەی بۆ هەڵبژاردن 142ە.
ئاسۆ مامەند، سەرۆکی هاوپەیمانیی (كەركوك هێز و ئیرادەمانە) بە تۆڕی میدیایی ئێستای راگەیاند، لە نەبوونی ئەنجومەنی پارێزگادا، دەسەڵاتەکان تاکلایەنانە مامەڵەیان لەگەڵ تەواوی پرسەکاندا کردووە، لایەنی کوردی هەستی بەو نادادپەروەرییە کردووە و هەر بۆ ئەو مەبەستە ئەم هەڵبژاردنە زۆر گرنگە.
وتیشی، “پێویستە هاوڵاتیان بەرەو سندوقەکانی دەنگدان بڕۆن و بەشداری لە هەڵبژاردندا بکەن، خەڵک لەوە تێدەگات کە هاوپەیمانیی (كەركوك هێز و ئیرادەمانە) لیستی سەرۆک مام جەلالە و، بەڵێن دەدەم ئەو کاندیدانەی سەرکەوتن بەدەستدەهێنن و دەچنە ئەنجومەنی پارێزگای کەرکوک، نوێنەری راستەقینەی هاوڵاتیان دەبن”.
سەرۆکی هاوپەیمانیی (كەركوك هێز و ئیرادەمانە) ئەوەشی خستەڕوو، ئەو کاتەی کە زۆرترین کورسیمان لە ئەنجومەنی پارێزگای کەرکوک بەدەستهێنا، هیچ رێگرییەک نامێنێت لەبەرامبەر دانانی پارێزگارێکی کورد بۆ کەرکوک هەڵبژاردنی ئەمساڵ دەبێتە پاڵپشت بۆ هێشتنەوە و چەسپاندنی پێگەی كورد لە شارەكەدا، هەربۆیە شارەزایەكی بوارەکە بە گرنگترین هەڵبژاردن ناویدەبات.
سەرباز سەید مەحمود، شارەزای بواری هەڵبژاردن بە تۆڕی میدیایی ئێستای راگەیاند، ئەو هەڵبژاردنە گرنگییەکی زۆری بۆ کورد لە پارێزگای کەرکوک هەیە، کورد بە چەندین لیست بەشداریکردووە، ئەوەش مەترسییە بۆ سەر پێگەی کورد لەو شارەدا.
وتیشی، “لە مێژووی ئەو شارەدا هیچ هەڵبژاردنێک هێندەی ئەم هەڵبژاردنەی ئێستا بۆ کورد گرنگ نەبووە، هەربۆیە لەسەر لایەنە سیاسییە کوردییەکان پێویستە هەوڵەکانیان چڕبکەنەوە بە ئاراستەی هاندانی هاوڵاتییانی کورد لە کەرکوک بۆ ئەوەی بەرەو سندوقەکانی دەنگدان بڕۆن لەپێناو سەرکەوتنی كورد”.
