تا یەکلاییکردنەوەی چارەنووسیان ئەنجومەنی پارێزگای سلێمانی کۆتایی بە کۆبوونەوە ئاساییەکانی خۆی هێناوە و چاوەڕێی بڕیاری حکومەتی هەرێم دەکات.
ئازاد حەمەئەمین سەرۆکی ئەنجومەنی پارێزگای سلێمانی بە تۆڕی میدیایی ئێستای راگەیاند، “لەراستیدا بڕیاری هەڵوەشاندنەوەی ئەنجومەنی پارێزگاکانی هەرێم کە لەلایەن دادگای فیدڕاڵییەوە دەرچووە، ئێمە لە راگەیاندنەکانەوە بیستوومانە و تا ئێستا هیچ نووسراوێکی فەرمیمان بۆ نەهاتووە، ئێمە چاوەڕێی بڕیاری حکومەتی هەرێمین و بڕیارەکان لە ئەوانەوە وەردەگرین”.
ئاماژەی بەوەشکرد، “تا ئەو کاتەی حکومەتی هەرێم بڕیاری یەکلاکەرەوە دەدات، کۆبوونەوەکان و دەرکردنی بڕیارەکانمان راگرتووە، بەڵام لە کارەکانی دیکەی رۆژانەی خۆمان وەک ئەنجومەن بەردەوامین”.
ئاشکراشیکرد، “ئێمە چاوەڕێی بڕیاری حکومەتی هەرێمین، گەر بڵێن ئەنجومەنەکان هەڵناوەشێنەوە دەستدەکەینەوە بە کۆبوونەوەکانی خۆمان، بە پێچەوانەشەوە”.
