بڕیارە ئەمڕۆ بزوتنەوەی ئیسلامی لە سلێمانی كۆنگرە گرێبدات كە بە كۆنگرەی دامەزراندن ناودەبرێت.
لیژنەی باڵای ئامادەکار بڵاویكردەوە كۆنگرەی دامەزراندن وەک یاسایەکی پارتە سیاسییەکان و کۆمسیۆن، ئەمڕۆ لە هۆڵی یانەی پێشمەرگە لە سلێمانی ئەنجام دەدرێت.
عیرفان عەلی عەبدولعەزیز، رابەری گشتی بزوتنەوەی ئیسلامی لە پەیامێكدا رایگەیاند، “تائێستا بزوتنەوەی ئیسلامی 12 كۆنگرەی بەستووە و هیچیان هەڵنەوەشاوەتەوە، بەڵام لێكتێنەگەیشتنێك لەنێوان ئێمە و كۆمسیۆن هەبوو، ئەوان پێیانوایە هەر حزب و رێكخراوێكی سیاسی دەبێ كۆنگرەی دامەزراندن بكات”.
ئەوەشی خستەڕوو، ئەو كەسانەی بەشداری لە كۆنگرەی دامەزراندنی بزووتنەوەی ئیسلامی دەكەن ژمارەیان دوو هەزار كەسە و پشتر لیستی ناوەكانیان ئامادەكراوە.
لای خۆیەوە كامیل حاجی عەلی بایكۆتی كۆنگرەی راگەیاند و دەڵێت، بەردەوام دەبن تا ئەوکاتەی کۆمیسیۆن پێشلێکارییەکان ڕاست دەكاتەوە.
هۆکارەکەشی بۆ “زیادکردنی زیاتر لە 170 کەس لەلایەن باڵی حاجی عیرفانەوە” دەگەڕێنێتەوە.
