دەستەی کەشناسیی و بومەلەرزەزانیی عێراق، هەموو ئەو پێشبینیانەی رەتکردەوە کە باس لە روودانی بومەلەرزەیەکی بەهێز دەکەنن لە داهاتوودا.
عامر جابری بەڕێوەبەری راگەیاندنی دەستەی کەشناسیی و بومەلەرزەزانیی عێراق رایگەیاند، “پرسی پێشبینیکردنی روودانی بومەلەرزە پێشبینییەکی نا واقعییە، هەرگیز ناتوانیت پێشبینی روودانی بکەیت”.
ئاماژەی بەوەشکرد، “هەندێک ناوچەی عێراق وەک خانەقین و کەلار و عەمارە، دەکەونە سەر هەمان ئەو هێڵی بومەلەرزەیەی ئێرانی لەسەرە بۆیە زۆرترین ئەگەری روودانی بومەلەرزەیان هەیە بەهۆی ئەو بومەلەرزانەی لە ئێران روودەدەن”.
پێشتر یەکێک لە پێشبینیکارەکانی بومەلەرزە بە ناوی هۆگربیتس رایگەیاندبوو، پێشبینی دەکرێت بومەلەرزەیەکی بەهێز لە عێراق رووبدات.
ئەمساڵ بەهێزترین بومەلەرزەکان بەراورد بە ساڵانی رابردوو روویانداوە، دیارترینیان بومەلەرزەکانی تورکیا و سوریا و مەغریب بوون.
