ئەندامێکی ئەنجومەنی نوێنەرانی عێراق رایدەگەیەنێت، حکومەتی هەرێم دەستی بەسەر40 موڵکی بانکی رەشید و رافیدەین-دا گرتووە و فرۆشتوونی.
سۆران عومەر، ئەندامی ئەنجومەنی نوێنەرانی عێراق دەڵێت، ماوەیەکە بەشوێن وردەکاریی موڵکەکانی هەردوو بانکی حکومیی رەشید و رافیدەینەوەم کە لەلایەن حکومەتی هەرێم لەشارەکانی سلێمانی و هەولێر و دهۆک دەستیان بەسەردا گیراوە و زۆرینەیان فرۆشراون.
ئاماژە بەوەش دەکات، تا ئێستا حکومەتی هەرێم ئامادەنەبووە ئەو موڵکانە بۆ بانکەکانی رەشید و رافیدەین بگەڕێنێتەوە و قەرەبوویان بکاتەوە، ئەوەش هۆکاری نەگەڕانەوەی ئەو بانکانەیە بۆ هەرێمی کوردستان.
سۆران عومەر دەڵێت، موڵکەکانی بانکی رەشید 16 موڵکن، دەکەونە (سلێمانی، چەمچەماڵ، رانیە، هەولێر، شەقڵاوە، دهۆک، ئاکرێ و زاخۆ).
دەشڵێت، موڵکەکانی بانکی رافیدەین 24 موڵکن دەکەونە (هەولێر، کۆیە، پیرمام، سلێمانی، قەڵادزێ، هەڵەبجە، دهۆک، شێخان، ئامێدی و سەرسەنگ).
