ئەندامێكی ئەنجومەنی پارێزگای سلێمانی داوادەكات ماوەی لێخۆشبوون لە كرێی ئاو درێژبكرێتەوە.
كاسترۆ مەعروف، ئەندامی ئەنجومەنی پارێزگای سلێمانی بە تۆڕی میدیایی ئێستای رایگەیاند، نووسراوێكیان ئاراستەی سەرۆكایەتی ئەنجومەن كردووە و تیایدا داوایانكردووە جارێکی دیكە وەزارەتی شارەوانی ماوەی لێخۆشبوونی کرێی ئاو درێژبکاتەوە.
لێخۆشبوونی كرێی ئاو بەڕێژەی 15%یە و مەبەست لێی هاندانی هاوبەشانە بۆ دانەوەی ئەو قەرزەی لەسەریان كۆبووەتەوە.
پێشتریش وەزارەتی كارەبا ماوەی لێخۆشبوونی كرێی كارەبای بەڕێژەی 15% درێژكردەوە و تا 23ی تشرینی دووەمی داهاتوو بەردەوام دەبێت.
ئەندامەكەی ئەنجومەن ئەوەشی خستەڕوو، داوایان كردووە وەزارەتی شارەوانی هاوشێوەی وەزارەتی كارەبا بڕیار لەوبارەیەوە بدات.
