بەڕێوەبەرایەتیی ئاسایشی شارەزوور، دەستیبەسەر كۆگایەكی هەڵگرتنی خۆراك لە شوێنی بەخێوكردنی ئاژەڵدا گرت.
ئاماژە بۆ ئەوەش كراوە، دوای بەدواداچوون و لێكۆڵینەوە و دەستكەوتنی زانیاری، هێزەكانی ئاسایشی شارەزوور توانیان رێگری بكەن لە ساغكردنەوەی بڕێكی زۆر لە خۆراكی ماوە بەسەرچوو.
لە راگەیەندراوەكەی ئاسایشی شارەزووردا هاتووە، لەدرێژەی كاروچالاكیەكانی هێزەكانی ئاسایش بە مەبەستی سەلامەتی هاوڵاتییان و ئاسایشی ئابوری و ڕێگریكردن لەو خۆراكانەی كە زیان بە تەندروستیی هاوڵاتییان دەگەیەنێت، لەسەر فەرمانی دادوەری لێكۆڵینەوەی ئاسایش، لە 6ی تەمموزدا توانرا زیاتر لە سێ تۆن خۆراك، پێكهاتبوو لە (برنج، ڕۆن، شەكر و دۆشاو) كە بەشێوەیەكی نەشیاو لە شوێنی بەخێوكردنی ئاژەڵ( گەوڕ)دا عەمباركرابوون دەستیبەسەردا بگیرێت.
ئاماژە بۆ ئەوەش كراوە، تۆمەتبارێك بەناوی ( م، ف، ص )دەستگیركرا كە بە نیازی ساغكردنەوەی بووە لە بازاڕدا و لە ئێستادا تۆمەتبار بەماددەی 240 لەیاسای سزادانی عێراقی راگیراوە و لێكۆڵینەوە لە دۆسیەكەی بەردەوامە.
