لە رووداوێکی هاتوچۆدا لە باشووری رۆژئاوای وڵاتەکە 17 کەس گیانیان لەدەستداوە و 29 ی دیکەش برینداربوون.
بەپێی میدیا ناوخۆییەکان، درەنگانی شەوی رابردوو لە پارێزگای وادی جەدید لە باشووری رۆژئاوای وڵاتەکە رووداوێکی هاتوچۆ لەنێوان پاسێک و بارهەڵگرێکدا روویداوە و لە ئەنجامدا لانی کەم 17 کەس گیانیان لەدەستداوە و 29 کەسیش برینداربوون کە برینی ژمارەیەکیان سەختە.
ئاشکراشیانکرد، “لەدوای رووداوەکە 26 ئەمبۆلانس گەیشتوونەتە شوێنی رووداوەکە و قوربانییەکانیان گواستووەتەوە”.
رووداوەکە لە کاتێکدا بووە پاسەکە 45 سەرنشینی هەڵگرتووە و بەرەو قاهیرەی پایتەخت بەڕێکەوتووە.
ساڵانە لە میسر ژمارەیەکی زۆر لە رووداوی هاتوچۆ روودەدەن، بەشێکیان بەهۆی پابەندنەبوون بە رێنماییەکان و بەشێکیشیان بەهۆی خراپی رێگەوبانەکانەوە روودەدەن.
