بڕیارە ئەمڕۆ یەكێتی و پارتی لەسەر ئاستی باڵا كۆببنەوە و تیایدا گرفتەكانی نێوانیان و كێشەكانی هەرێم تاوتوێبكەن.
كۆبوونەوەكەی ئەمڕۆ لە سلێمانی لەسەر ئاستی مەكتەبی سیاسیی هەردوولا دەبێت.
پێنجشەممەی رابردوو سۆران جەمال تاهیر، وتەبێژی یەكێتیی نیشتمانیی كوردستان لە كۆنگرەیەكی رۆژنامەوانیدا وادەی كۆبوونەوەكەی ئاشكراكرد و رایگەیاند، “كێشەكان چارەسەربكرێن و رێككەوتنەكانی پێشتر بۆ پێكهێنانی كابینەی حكومەتی هەرێم كە ئەنجامدراون جێبەجێبكرێن، تیمی یەكێتی بەشداریی كۆبوونەوەكانی حكومەت دەكاتەوە و ئێمە دەمانەوێت ئەو كێشانەی كە هەن بە دانوستان لەنێوانماندا چارەسەربكرێن”.
وتیشی، “یەكێتی سوورە لەسەر ئەنجامدانی هەڵبژاردن، بەڵام دەبێت یاسای هەڵبژاردن لە پەرلەمانی كوردستان هەمواربكرێتەوە و هەرێمی كوردستان بكرێتە چوار بازنە لە سیستمی هەڵبژاردن، لەگەڵ ئەوەشدا تۆماری دەنگدەران پاكبكرێتەوە و كار بە سیستمی كارتی بایۆمەتری دەنگدان بكرێت”.
