كازم ساهر، گۆرانیبێژی دیاری عەرەب، قایل بوو بە بڵاوكردنەوەی ئەو كتێبەی لەبارەی ژیانی كۆمەڵایەتی و هونەرییەوە نووسراوە.
حسێن جەبار، برای كازم ساهر لە لاپەڕەی خۆی لە تۆڕی كۆمەڵایەتیی فەیسبووك بڵاویكردەوە، ماوەی دوو ساڵە كتێبێكی نووسیوە بە ناونیشانی “كازم ساهر و خێزانەكەی” كە لە زیاتر لە 400 لاپەڕە پێكدێت.
براكەی كازم نووسیویەتی، “كتێبەكەم بەوپەڕی ڕاستگۆیی و دڵسۆزی و بابەتیبوونەوە نووسیوە و زیاتر لە 50 جار لەگەڵ كازم-دا دانیشتم تا كتێبەكەم تەواوكرد.”
حسێن جەبار ئاشكرایدەكات كە لە دوو ساڵی ڕابردوودا كازم ڕێگەی نەدەدا كتێبەكە بڵاوبكرێتەوە، ئەوەش لەپێناو لەبەرچاوگرتنی هەستی هەندێك كەس، بەڵام ئێستا ڕەزامەندی نیشانداوە و كتێبەكە لە سەرەتای ساڵی داهاتوودا بڵاودەكرێتەوە.
