ئەمشەو چوارشەممە، لە (استاد 974) یاریی گەڕی سێیەمی قۆناغی کۆمەڵەکان لە نێوان ئەرجەنتین و پۆڵەندا ئەنجامدەدرێت.
لەو یارییەدا هەردوو هەڵبژاردەکە بۆ بردنەوە یاریدەکەن، سەرکەوتن دەیانگەیەنێت بە قۆناغی (16)، ئەنجامی دۆڕاندنیش لە سوودی “سەماکەرانی تانگۆ” نییە، ئەنجامی یەکسانبوونیش دەیانخاتە گێژاوی کۆکردنەوە و هەژماری گۆڵە تۆمارکراوەکانەوە.
لێرەدا داتا مێژووییەکانی نێوان هەردوو جەمسەرەکە دەخەینەڕوو:
یەکەم: سێیەمین یارییە لە نێوان پۆڵەندا و ئەرجەنتین بە درێژایی مێژووی مۆندیال.
1974 پۆڵەندا 3-2 ئەرجەنتین
1978 ئەرجەنتین 2-0 پۆڵەندا.
دووەم: لە ساڵی 2011وە یەکەمینجارە ڕووبەڕووبوو دەبنەوە، لەو ساڵەدا لە یارییەکی دۆستانەدا پۆڵەندا 2-1 بردنەوەی تۆمارکردووە.
سێیەم: پۆڵەندا دوایین سێ یاریی بەرامبەر هەڵبژاردەکانی ئەمریکای باشوور دۆڕاندووەو هیچ گۆڵێکی تۆمار نەکردووە.
چوارەم: ئەرجەنتین لە دوایین دوو یاریی مۆندیالدا بەرامبەر بە هەڵبژاردە ئەوروپییەکان دۆڕاندوویەتی، کرواتیا 3-0 و فەرەنسا 4-3 لە مۆندیالی 2018، تاوەکو ئێستا سێ یاری لەسەریەکی لە مۆندیالدا بەرامبەر هەڵبژاردە ئەوروپییەکان نەدۆڕاندووە.
پێنجەم: ئەرجەنتین لە کۆی بەشدارییەکانی لە مۆندیال، تەنها جارێک لە مۆندیالی 2002دا لە قۆناغی کۆمەڵەکانەوە ماڵئاواییکردووە.
شەشەم: پۆڵەندا لە دوای مۆندیالی 1986وە، لە قۆناغی کۆمەڵەکان تێپەڕی نەکردووە.
حەوتەم: لیۆنێل مێسی پێویستی بە دوو گۆڵە بۆ ئەوەی بە (10) گۆڵ لەگەڵ گابریێل باتیستۆتا وەک گۆڵکاری ئەرجەنتین لە مۆندیال هاوتا ببێتەوە.
هەشتەم: مێسی شەش یاریی بەرامبەر ڤوچنیچ چێزنی گۆڵپارێزی پۆڵەندا کردووە، پێنج گۆڵی لەسەر تۆمارکردووە.
