شاندێکی باڵای یەکێتیی نیشتمانیی کوردستان، بە سەرۆکایەتیی بافڵ تاڵەبانی هاوسەرۆکی یەکێتیی نیشتمانیی کوردستان، پێسنیوەڕۆی ئەمڕۆ دووشەمە 7ی کانونی یەکەم، کاتژمێر 11:00 سەردانی بزوتنەوەی گۆرانی کرد و لە ئێستادا لەگەڵ شاندی باڵای بزوتنەوەی گۆڕان لە کۆبوونەوەدان.
شاندەکەی یەکێتی بە سەرۆکایەتیی بافڵ تاڵەبانی و بە یاوەریی هەریەکە لە شاناز ئیبراهیم ئەحمەد، شاڵاو عەلی عەسکەری و سۆران جەمال تاهیر، لەگەڵ شاندی باڵای گۆڕان بە سەرۆکایەتیی عومەری سەید عەلی، ڕێکخەری گشتیی بزوتنەوەکە و ئەندامێتی عەدنان عوسمان، جەمال محەمەد، بەختیار ئاڵی و دەرباز محەمەد لە کۆبوونەوەدان.
مەبەستی کۆبوونەوەکە چەند تەوەرێک دەبێت، لەوانە ئامادەکاری و کۆدەنگی لایەنەکانی سلێمانی بەتایبەت یەکێتی و گۆران بۆ کۆبوونەوەی سێ قۆڵی کە بڕیارە سبەینێ لە سەرۆکایەتیی هەرێمی کوردستان ئەنجام بدرێت.
یەکێکی دیکە لە تەوەرەکان گرژییەکانی ئەم چەند ڕۆژەی دوایی و گرژییەکانی شەوی ڕابردووی پیرە مەگروون و چونە سەر بارەگای حزبەکان و ئاڵۆزییەکان دەبێت.
