لە میانەی سەردانەكەیدا بۆ پارێزگای هەڵەبجە، قوباد تاڵەبانی جێگری سەرۆك وەزیران مەرزی شوشمێی بەسەركردەوە و رایگەیاند، ” بەم نزیكانە مەرزەكە بە فەرمی بە ڕووی گەشتیاراندا دەكرێتەوە و ئەمەش كاریگەری دەبێت لەسەر بووژانەوەی ئابوریی هەڵەبجە و هەورامان”.
قوباد تاڵەبانی لە سەردانەكەیدا دوای ئەوەی بە وردی لە كێشە و گرفتەكانی مەرزەكەی كۆڵییەوە، ئاماژەی بە كۆبوونەوەی هەفتەیەك لەمەوبەری خۆی لەگەڵ وەزیری ناوخۆی عێراق كرد كە بڕیارە بە هەماهەنگی نێوان هەردوو حكومەتی هەرێم و حكومەتی فیدراڵ كاربكرێت بۆ فراوانتركردنی مەرزی شوشمێ لە سنووری تەوێڵە.
هەر لە چوارچێوەی فراوانكردنی مەرزەكەدا، لە ماوەیەكی نزیكدا گەشتیاران دەتوانن بە فەرمی بە ئۆتۆمبێلی خۆیان لە نێوان هەرێم و ئێراندا هاتوچۆ بكەن، ئەمەش یارمەتیدەردەبێت لە بوژانەوەی زیاتری ئابوری و گەشەكردنی كەرتی گەشتوگوزاری لە پارێزگای هەڵەبجە.
