بافڵ جەلال تاڵەبانی سەرۆكی یەكێتیی نیشتمانیی كوردستان بەبۆنەی ساڵیادی دامەزراندنی یەكێتیی ژنانی كوردستانەوە پەیامێكی پیرۆزباییان ئاراستە دەكات.
لە پەیامەكەی سەرۆكی یەكێتیدا هاتووە، “بەبۆنەی ساڵیادی دامەزراندنی یەكێتییەكەتانەوە، پیرۆزباییەكی گەرمتان لێدەكەم و هیوای بەردەوامی و سەركەوتنتان بۆ دەخوازم، یەكێتیی ژنانی كوردستان لە ماوەی 33 ساڵی كاركردنیدا، ڕۆڵێكی گرنگ و بەرچاوی گێڕاوە لە داكۆكیكردن لە مافەكانی ژنان و گەشەپێدانی تواناكانیان”.
جەختیشدەكاتەوە، “یەكێتیی ژنان وێستگەیەكی گرنگی پێگەیاندنی دەیان ژنی سەركردە و كادری بە توانا بووە كە بەشداریی گرنگیان هەبووە لە پڕۆسەی سیاسی و بەڕێوەبردنی وڵاتدا و ئەمەش دەرخەری ئەو ڕاستییەیە كە یەكێتیی نیشتمانیی كوردستان باوەڕێكی پتەو و نەگۆڕی بە مافەكانی ژنان و تواناكانیان هەیە و بەردەوام داكۆكیكارێكی سەرسەختی ئازادی و یەكسانی بووە”.
لە كۆتایی پەیامەكەی بافڵ جەلال تاڵەبانی -دا هاتووە، “هیوادارم لە ساڵی نوێی كاركردنتاندا بە هەمان ڕۆحییەتەوە لە هەوڵەكانتان لە پێناو بەدیهێنانی داوا ڕەواكانی ژنان و دەستەبەركردنی مافەكانیان لە كاركردن بەردەوامبن و ئێمەش پاڵپشت و پشتیوانتان دەبین”.
