سەرۆكی لیژنەی دارایی لە پەرلەمانی كوردستان ڕوونكردنەوە لەبارەی دروستكردنی هەژماری بانكی بۆ مووچەخۆران دەدات و جەختیشدەكاتەوە بەپێی بەدواداچوونەكانمان وەزارەتی دارایی هەنگاوەكانی بۆ دروستكردنی هەژمارەكە دەستپێكردووە.
زیاد جەبار سەرۆكی لیژنەی دارایی لە پەرلەمانی كوردستان لە لێدوانێكدا بە تۆڕی میدیایی ئێستای ڕاگەیاند، بەپێی یاسای ژمارە 2ی ساڵی 2020 كە دەرچووێندراوە حكومەت پابەنددەكرێت بە دروستكردنی هەژماری بانكی بۆ مووچەخۆران و بۆ ئەو پرسەش لەگەڵ وەزارەتی دارایی هەرێمدا بەدواداچوونمان كردووە.
ئاماژەی بۆ ئەوەش كرد، بەپێی بەدواداچوونەكانمان لەگەڵ وەزارەتی دارایی كار لەسەر ئەو بابەتە دەكرێت كە تێیدا شایستە داراییەكان و بەپێی یاساكە كە لە ماددەی 13ی دا هاتووە شایستەی دارایی خەرجكراو و ئەو پارەیەی كە نەدراوە، وەزارەتی دارایی هەرێم ڕێنمایی بۆ دەربكات كە چۆن بتوانرێت مامەڵەی لەگەڵدا بكات كە لە بەرژەوەندیی مووچەخۆراندا بێت.
