بەهێزترین مووشەك لە جیهاندا (فالكۆن هێڤی) ئەمڕۆ گەڕایەوە بۆ كاركردن، پاش وەستانی بۆ ماوەی سێ ساڵ، بۆ ئەنجامدانی “ئەركێكی نهێنی”ی سوپای ئەمریكا، بەپێی تۆڕی (سی ئێن ئێن).
مووشەكەكە كە سەر بە كۆمپانیای (سپەیس ئێكس)ە بەیانیی ئەمڕۆ لە ناوەندی كێنێدیی بۆشایی ئاسمان-ی سەر بە ناسا لە فلۆریدا هەڵدرا.
مووشەكەكە ژمارەیەك مانگی دەستكردی سوپای ئەمریكای هەڵگرتووە، بۆ ئەوەی بیگەیەنێتە بۆشایی ئاسمان، لە ئەركێكی نهێنیدا كە ناوی (USSF-44)ی پێدراوە، وەك ئەوەی تۆڕەكە ئاماژەی پێداوە.
پێشتر كۆمپانیاكە ساتی گەڕانەوەی مووشەكە زەبەلاحەكەی بۆ زەوی نمایشكرد.
(سپەیس ئێكس) یەكەم كۆمپانیایە توانیویەتی مووشەكەكانی بۆشایی ئاسمان بگەڕێنێتەوە و سەرلەنوێ بەكاریبهێنێتەوە بۆ پڕۆسەی گواستنەوەی دیكە.
مووشەكی (فالكۆن هێڤی) یەكەمجار لە ساڵی 2018دا دەركەوت و دەنگدانەوەی زۆری بەدوای خۆیدا هێنا، دوای ئەوەی ئیلۆن مەسك-ی بەڕێوەبەری جێبەجێكاری كۆمپانیاكە و ملیاردێری ئەمریكی بڕیاری هەڵدانیدا بە هەڵگرتنی ئۆتۆمبێلەكەی خۆی (تێسلا رۆدستر) و گواستنەوەی بۆ بۆشایی ئاسمان.
لەو ئەركە تاقیكردنەوەییەوە، سپەیس ئێكس تەنها دوو ئەركی بە (فالكۆن هێڤی) ئەنجامداوە، هەردووكی لە ساڵی 2019دا بووە، لە یەكێكیاندا مانگێكی دەستكردی زەبەلاحی خزمەتگوزارییەكانی تۆڕی (ئۆربت)ی ئاسمانیی سەر بە سعودی رەوانەكرد، ئەوی دیكەش بۆ گواستنەوەی ژمارەیەك مانگی دەستكردی ئەزموونیی سەر بە وەزارەتی بەرگریی ئەمریكا بوو.
بەڵام مووشەكەكە لە ساڵی 2019ەوە هەڵنەدراوە، بەهۆی ئەوەی زۆرینەی ئەركەكانی كۆمپانیای (سپەیس ئێكس) پێویستی پێی نییە.
لەكاتێكدا مووشەكی فالكۆن 9 كە بە بڕبڕەی پشتی كۆمپانیاكە دادەنرێت، تەنها لەمساڵدا و تائێستا نزیكەی 50 ئەركی ئەنجامداوە.
