کارلۆ ئەنچیلۆتیی ڕاهێنەری یانەی ڕیاڵ مەدرید، بە حەزەرەوە ئاماژە بە داتاکانی یانەی بەرشلۆنە و ئاستیان دەکات لەم وەرزەی خولی ئیسپانیا.
ڕاهێنەرە ئەزمووندارەکەی ڕیاڵ مەدرید لە کۆنگرەی ڕۆژنامەوانی بەر لە یاریی کلاسیکۆ، ڕایگەیاند، “لە یارییەکانی ئەم وەرزەی خولی ئیسپانیا، بەرشلۆنە تەنها یەکسانبوونێکی هەیە و لە ڕووی دینامیکییەوە لە خولی ناوخۆدا زۆر کارا و بەهێزن.”
هەروەها دەڵێت، “لە خولی یانە پاڵەوانەکانی ئەوروپا دووچاری کێشە بوون، هەمان ئەو کێشانەی دەکرێت ڕووبەڕووی هەر تیمێک ببێتەوە، بەڵام لە خولی ناوخۆ ئاستیان ناوازە بوو، بۆیە دەبێت بە حەزەرەوە لێیان بڕوانین.”
لەم وەرزەی “لالیگا”دا بەرشلۆنە باشترین ئاستی پێشکەشکردووە، (20) گۆڵیان تۆمار کردووە و تەنها گۆڵێکیان لەسەر تۆمارکراوە.
وەک دەردەکەوێت، ئەنچیلۆتی حەزەر لە ئاستی هێرشبەریی بارسا و لە هەمان کاتدا هێز و توانای هێڵی هێرشبردنی پێکهاتەکەی دەکات لە تێکشکاندنی بەرگریی پۆڵایینی یانە کەتەلۆنییەکە.
