پارێزگاری سلێمانی لە ڕوونکردنەوەیەکدا بڵاویکردەوە شارەکە ئارامە و بە ئارامیش دەمێنێتەوە و ئەرکی هەموو کوردێکیشە لە هەر شوێنێک بێت ئارامیی و سەقامگیریی و ئاسایش و ئابووریی و ژیانی سلێمانی بپارێزێت.
پارێزگاری سلێمانی ئەمڕۆ چوارشەممە لە ڕوونکردنەوەیەکدا بڵاویکردەوە، “ماوەیەکە، چەند سایتێک، نابەرپرسیارانە لە هەوڵی بڵاوکردنەوەی پڕوپاگەندەی چەواشەکارانەدان بۆ ترساندنی هاوڵاتیانی سلێمانی و دانیشتوانی بەڕێزی گەڕەکەکانی سلێمانی، گوایە دەکەونە بەر هێرشی بۆردومانی وڵاتە دراوسێکانەوە، هەموو هاوڵاتیانی خۆشەویست لە ناڕاستیی ئەو هەواڵانە، دڵنیا دەکەینەوە و داوایان لێدەکەین نەکەونە ژێر فشاری دەروونیی چەواشەکارانەوە”.
ئاماژەی بەوەشکرد، “سلێمانی ئارامە و بە ئارامیش دەمێنێتەوە، هەمیشە هاوکار و پشتیوانی هەر کوردێک بووە و دەبێت، لە هەر شوێنێک بووبێت، ئەرکی هەموو کوردێکیشە لە هەر شوێنێک بێت ئارامیی و سەقامگیریی و ئاسایش و ئابووریی و ژیانی سلێمانی بپارێزێت”.
