بەڕێوەبەرایەتیی گشتیی پۆلیسی گەرمیان ڕایگەیاند، کەسێکیان دەستگیرکردووە کە بڕێک پارە و 17 مسقاڵ ئاڵتوونی لە دراوسێکەیان دزیبوو.
لە ڕاگەیەندراوێکدا پۆلیسی گەرمیان بڵاویکردەوە، دوای ئاگادارکردنەوەیان لە ڕووداوی دزییەکە لە ماوەی کەمتر لە یەک کاتژمێردا تۆمەتبارەکەیان دەستگیرکرووە و دانیناوە بە تاوانەکەیدا.
پۆلیسی گەرمیان ئاماژەی بۆ ئەوەکردووە، هاوڵاتییەک لە کاتژمێر 8:00ی شەوی ڕابردوو ئاگاداریکردوونەتەوە کە لە گەڕەکی ژاڵەی ناحیەی ڕزگاری دزی لێکراوە.
پۆلیسی ڕزگاری لە ماوەی کاتژمێرێکدا توانیویەتی تۆمەتبارەکە بەناوی (م. ا. ف) دەستگیربکات و لەکاتی لێکۆڵینەوەدا دانیناوە بە تاوانەکەیدا.
ئەو تۆمەتبارەی دەستگیرکراوە بڕی یەک ملیۆن و 300 هەزار دینار و 17 مسقاڵ ئاڵتوونی لە دراوسێکەیان دزیوە، ئێستا بەبڕیاری دادوەر ڕاگیراوە.
