حكومەت لەبارەی باجەوە بڕیارێكی نوێی دەركرد

جێگری بەڕێوەبەری گشتیی بەڕێوەبەرایەتی باجەكان و خانووبەرەی میری ڕایگەیاند، بریاری درێژكردنەوەی لێخۆشبوون لەسەر باج بووەتە هۆی ئەوەی بڕێك نەختینە لە بانكەكان لە ڕێگەی وەرگرتنی باجەوە زیاد بكەن.

عەلی عەبدولڕەحمان جێگری بەڕێوەبەری گشتیی بەڕێوەبەرایەتی باجەكان و خانووبەرەی میری بە فەرمانگەی میدیا و زانیاری ڕاگەیاند ” لە ساڵانی ڕابردوودا بەهۆی خراپیی دۆخی هەرێمی كوردستان، خەڵكێكی زۆر نەیاندەتوانی ئەو باجەی لەسەریانە بیدەنەوە، بۆیە ساڵانەش ئەگەر باج نەدرێت بڕی سزاو سوود زیاددەكات، و لەسەر داواكاریی ئێمە و وەزارەتی دارایی، سەرۆكایەتیی ئەنجومەنی وەزیران، بە بڕیاری ژمارە (156) لە 15ی حوزەیرانی 2022، بڕیاری لێخۆشبوونی لەسەر بڕی سزا و سوودی سەر باجدەران دا.”

ڕاشیگەیاند، ئەو بابەتە دوو لایەنەیە كە لایەنی یەكەمی ئەوەیە كەس ناتوانێت خۆی لە باج بدزێتەوە و بڵێت باج نادەم، چونكە ئەگەر باجدەرەكە بشمرێت ئەوا دەبێت میراتگرەكانی بڕی باجەكە بدەنەوە، بۆیە لە ڕێگەی هۆشیاركردنەوەوە خەڵكیان ئاگاداركردەوە كە بێن بۆ ئەوەی باجەكەیان بدەن و ئەم لێخۆشبوونە بیانگرێتەوە.

ئاماژەی بۆ ئەوەش كرد، “لایەنێكی دیكەی ئەوەیە توانراوە بڕێك پارەی نەختینە لە بانكەكان لە ڕێگەی وەرگرتنی باجەوە زیاد بكەین، ئەوەش كارێكی گرنگ بووە كە بەڕێوەبەرایەتیی گشتی باجەكان و خانووبەرەی میری بەو كارە هەڵساوە و جێبەجێیكردووە لە پێشتر بانكەكان و گەنجینەكان نەختینەی ئەوتۆی تێدا نەبووە بۆیە بیرمان لەوە كردەوە ئەوانەی قەرزداربوون و لە ساڵانی پێشتر باجیان لەسەر بوو بێن باجەكانیان بدەن و لەو سزا و قازانجەی كەوتبووە سەریان ڕزگاریان بێت و لەو بڕیارە سوودمەند بن.”