جێگری بەڕێوەبەری گشتیی پەروەردەی سلێمانی لەبارەی ئامادەکارییەکان بۆ ساڵی نوێی خوێندن رایدەگەیەنێت، لەوپەڕی باشیدایە و هیچ خوێندنگەیەک نییە سێ دەوامی تێدا بکرێت.
عومەر محەمەد، جێگری بەڕێوەبەری گشتیی پەروەردەی سلێمانی لە لێدوانێکیدا ئەوەی خستەڕوو، ”هەموو ئامادەکارییەکان بۆ ساڵی نوێی خوێندن لەوپەڕی باشیدایە و جیاواز لە ساڵانی رابردوو پێش دەستپێکردنی ساڵی نوێ هیچ تاقیکردنەوەیەک نامێنێت کە پێشتر گرفتی بۆ دروستدەکردین”.
ئاماژەی بەوەشکرد، ”ئەوەی دەمێنێتەوە دابەشکردنی وانەکانە بەسەر مامۆستایان لەگەڵ دابەشکردنی خوێندکاران بەسەر پۆل و خوێندنگەکاندا کە بەخشتەیەک ئەوەش رێکخراوە و کارئاسانی باشی کردووە خوێندنگاکان”.
سەبارەت بە دەوامی خوێندنگاکان لە سنووری سلێمانی دەڵێت، ”بەهیچ شێوەیەک چوار دەوامی و سێ دەوامیمان نییە، ئەوەی کە دەوترێت سێ دەوامییە ئەوە دەوامی ئێوارانە و لەدوای کاتژمێر چوار دەستپێدەکات”.
