سەرۆكی لقی سلێمانی سەندیكای كارمەندانی تەندروستی ڕایدەگەیەنێت، ئەو بەڵێنانەی پێماندرابوو بۆ دامەزراندنی كارمەندانی خۆبەخش تائێستا جێبەجێنەكراوە، جەختیشدەكاتەوە پێشتر بە نووسراوی نهێنی دامەزراندن بۆ چەند شوێنێكی دیكە كراون و سلێمانی بێبەشكراوە.
هاوژین عوسمان سەرۆكی لقی سلێمانی سەندیكای كارمەندانی تەندروستی لە كۆنگرەیەكی ڕۆژنامەوانیدا ڕایگەیاند، زیاتر لە 12 هەزار دانەمەزراوی تەندروستییمان هەیە و پێنج هەزار دانەمەزراویش فەرمانی خۆبەخشیان هەیە و دانەمەزرێندراون.
ئاشكرایكرد، “چەند جارێك داوامانكردووە دەرفەتی دامەزراندنیان بۆ بڕەخسێندرێت و لە چەند ناوەندێكی تەندروستیی گرفتی كەمیی كارمەندانی تەندروستیمان هەیە و تائێستا هەوڵەكان هیچ ئەنجامێكی نەبووە”.
ئاماژەی بۆ ئەوەش كرد، وەزارەتی تەندروستی بە نووسراوی نهێنیی دامەزراندنی بۆ چەند شوێنێكی دیكە ئەنجامداو سلێمانی بێبەشكراوە و ئێمە وەكو سەندیكا پشتیوانی لە داوا ڕەواكانی دانەمەزراوان دەكەین.
