پیاوێك لە نوێژدا كاتێك كڕنووش دەبات، دراوسێكەی چەقۆیەك لە ملی دەدات و دەیكوژێت.
ڕووداوەكە دوێنێ لە كاتی ئەنجامدانی نوێژی هەینیدا ڕوویداوە، ئەمڕۆ بڵاوكرایەوە و میدیای میسری بە “تاوانێكی سەیر” ناوزەدیكردووە و دەڵێت، پیاوێك لە گوندێكی شاری دكرنەسی پارێزگای دەقهەلییە، لە كاتی كڕنووشبردندا دراوسێكەی كوشتووە.
بەپێی زانیارییەكان، كوژراوەكە ناوی عەوەز شربینییە و تەمەنی 48 ساڵ بووە، دراوسێكەی بە ناوی سابیر فەرەجی تەمەن 33 ساڵ لە كاتی دوایین كڕنووشی نوێژی هەینیدا، لە پشتەوە چەقۆیەكی داوە لە ملی قوربانییەكە و دەستبەجێ گیانیلەدەستداوە.
نوێژخوێنان بكوژەكەیان لە ناو مزگەوتەكەدا دەستبەسەركردووە و ڕادەستی پۆلیسیان كردووە. بەپێی دانپێدانانی بكوژەكە لە لێكۆڵینەوەدا، كوژراوەكە بە بەرچاوی خەڵكەوە سەرزەنشتی كردووە چونكە بكوژ “نووسین و وێنەی لەسەر دیوارەكانی ناو گوندەكە كێشاوە كە لە جادوو دەچوون”. لە تۆڵەی ئەو سەرزەنشتكردنەدا، تۆمەتبارەكە بڕیاریداوە لە كاتی نوێژی هەینیدا بە بەرچاوی خەڵكەوە بیكوژێت.
