بەرپرسێكی وەزارەتی ئەوقاف و كاروباری ئایینیی هەرێم ڕوونكردنەوە لەبارەی گرانیی نرخی گەشتی عەمرە دەدات، جەختیشدەكاتەوە جیاوازیی نرخی گەشتی عەمرە لەلایەن كۆمپانیاكانەوە بەهۆی شێوازی پێشكەشكردنی خزمەتگوزارییەكانیانەوەیە.
نەبەز ئیسماعیل، وتەبێژی وەزارەتی ئەوقاف و كاروباری ئایینیی هەرێم لە لێدوانێكدا بە تۆڕی میدیایی ئێستای ڕاگەیاند، لە سەرەتای ئەم مانگەوە گەشتی عەمرە دەستیپێكردووەتەوە، هاوڵاتییان دەتوانن لە ڕێگەی كۆمپانیاكانەوە گەشتی عەمرە ئەنجامبدەن.
ئاشكرایكرد، وەزارەتی ئەوقاف و كاروباری ئایینیی هەرێم و بەڕێوەبەرایەتیی گشتی حەج و عەمرە لیژنەیەكیان پێكهێناوە بۆ چاودێریكردنی ئەو كۆمپانیایانەی كە گەشتی عەمرە ڕێكدەخەن.
ئاماژەی بەوەشكرد، بەشێك لە كۆمپانیاكان 900 دۆلار بۆ گەشتی عەمرە وەردەگرن و بەشێكی دیكەیان 950 بۆ 1000 دۆلار وەردەگرن و جیاوازیی نرخەكەش پەیوەندی بە شێوازی پێشكەشكردنی ئەو خزمەتگوزارییانەوە هەیە كە پێشكەشی عەمرەكاران دەكرێت.
