80 هەزار دینار دەدرێت بەهەر حاجییەک، کە ساڵى رابردوو بە فڕۆکە گەشتى سعودییەى کرد و لەو سەرەوە بەناچارى بە پاس گەڕاوەتەوە.
کاروان ستوونی، وتەبێژی بەڕێوەبەرایەتیی گشتیی حەج و عومرەی هەرێمی کوردستان بە تۆڕی میدیایی ئێستای راگەیاند، ئەو حاجییانەی ساڵی پار بەهۆی گرژییە سیاسییەکان و رووداوەکانی ناوچەکەوە بە رێگەی ئاسمانی گەشتیان بۆ سعودییە ئەنجامدا و بە ناچاری بە رێگەی وشکانی گەڕانەوە، قەرەبوو دەکرێنەوە.
وتیشی، پڕۆسەکە هەفتەی داهاتوو لە سلێمانی، هەڵەبجە، ئیدارەی راپەڕین و گەرمیان دەستپێدەکات، بڕی قەرەبووەکە 80 هەزار دینارە و بە میکانیزمێکی ورد بەسەریاندا دابەشدەکرێت، بەڵام دەبێت حاجییان خۆیان سەردان بکەن.
ئاماژەی بەوەشکرد، بەگشتی، ژمارەی حاجییەکان سێ هەزار و 400 کەس دەبێت، کۆی گشتی قەرەبووەکە دەگاتە 272 ملیۆن دینار.
