ئەنجومەنی وەزیرانی هەرێمی کوردستان ئەمڕۆ چوارشەممە کۆبوونەوەی هەفتانەی ئەنجامدەدات، لە کۆبوونەوەکەدا کێشەکانی پەیوەست بە دابینکردنی ئاوی پاک بۆ هاوڵاتییان تاوتوێدەکرێت.
لە ڕاگەیەندراوێکدا فەرمانگەی میدیا و زانیاریی هەرێمی کوردستان بڵاویکردەوە، کۆبوونەوەکە پێشنیوەڕۆی ئەمڕۆ بە سەرۆکایەتیی مەسرور بارزانی سەرۆکی ئەنجومەنی وەزیران و قوباد تاڵەبانی جێگری سەرۆکی ئەنجومەنی وەزیران ئەنجامدەدرێت.
یەکێک لە تەوەرەکانی کۆبوونەوەکە خستنەڕووی ڕاپۆرتی وەزیری شارەوانی و گەشتوگوزار دەبێت، سەبارەت بە دۆخی خزمەتگوزاری دابینکردنی ئاوی پاک بۆ هاوڵاتییانی هەرێمی کوردستان و کێشە و چارەسەرەکانی.
لە کۆبوونەوەی ئەمڕۆدا زانیاری سەبارەت بە پڕۆژەکانی خزمەتگوزاریی گشتی، کە لە کابینەی نۆیەمدا جێبەجێکراون یان لە قۆناغی جێبەجێ کردندان دەخرێنەڕوو.
