هێرشبەری ئورۆگوایی یانەی مانچستەر یونایتد، ئیدینسۆن کاڤانی بەهۆی وەڵامدانەوەی هەوادارێکیەوە لە تۆڕی کۆمەڵایەتی ئینستاگرام، ئەگەر هەیە سزای قورس بدرێت.
شەوی ڕابردوو، یەکشەممە لە ڕوبەڕوبوونەوەی نێوان یانەکانی مانچستەر یونایتد و ساوزامپین، ئیدیسنۆن کاڤانی بە تۆمارکردنی دوو گۆڵ ئەنجامەکەی بەسەر یانە ڕکابەرەکەیدا پێچەوانەکردەوە.
لەلایەن میدیاکانەوە هندییە سوورەکەی ئورۆگوای وەک پاڵەوانی ڕوبەڕوبوونەوەکە ناسێنرا و هەریەک بە شێوەیەک وەسفی باشییەکانی ئەم یاریزانەیان لە ڕووی ڕوحیەتی یاریکردنەوە دەکرد، بەڵام دواتر بەهۆی پۆستێکی تۆڕی کۆمەڵایەتی ئینستاگرامەوە دۆخەکە پێچەوانەبووەوە.
هاندەرێکی کاڤانی لە ئینستاگرام پۆستێکی کردووە و نوسیویەتی “سوپاس ماتادۆر خۆشمدەوێیت”، یاریزانەکەش لە وەڵامدا نوسیویەتی سوپاس ڕەشی بچوک”، بێگومان وشەی (نێگە) یاخود (ڕەشی بچوک) دەچێتە فەرهەنگی ڕەگەزپەرستییە و لە پێشوودا چەندین یاریزان بەم هۆیەوە سزای قورسدراون.
لە ساڵی 2011 لویس سوارێز هەمان وشەی بەرانبەر پاتریس ئێڤرا بەکارهێنا و سزای حەوت یاری سڕکردنی بەسەردا سەپێنرا.
ڕۆژنامەی زە سەنی بەریتانی جەختی لەوەکردووەتەوە، کە ڕایەڵەی یانەکانی ئینگلتەرا دەستیان بە لێکۆڵینەوە لە کاڤانی کردووە و بە ئەگەرێکی زۆرەوە بۆ ماوەی سێ یاری سزای سڕکردنی بەسەردا دەسەپێنرێت.
