حكومەتی عێراق قەرەبووی بەشێك لەو هاوڵاتییانەی هەرێمی كوردستان دەكاتەوە كە لە سەردەمی ڕژێمی بەعسدا زیانی ماددییان بەركەوتووە و دەستەبەسەر موڵەكانیاندا گیراوە.
لە قۆناغی یەكەمی قەرەبووكردنەوەكەدا حكومەتی عێراق 501 ملێۆن دیناری ڕەوانەكرد و پارەكە گەیشتووەتە هەرێمی كوردستان، بڕیارە سبەینێ سێشەممە دەست بە دابەشكردنی پارەكە بكرێت.
تارا ئەنوەر قەرەداغی، بەڕێوەبەری گشتیی دەستەی داواكانی موڵكداری ڕایگەیاند، بۆ قەرەبووكردنەوەی ئەو هاوڵاتییانەی هەرێمی كوردستان كە لە سەردەمی ڕژێمی پێشووی عێراقدا دەستبەسەر موڵكەكانیاندا گیراوە و لەدەستیانداون، لیژنەی دادوەریی دەستەكەیان داواكاریی پێشكەشكردووە.
ئاشكرایكرد، داواكارییەكە پلەی كۆتایی وەرگرتووە و ئەو هاوڵاتییانەی زیانیان بەركەوتووە قەرەبوودەكرێنەوە و سەرەتا 47 كەس لە قەرەبووكردنەوەكە سوودمەنددەبن.
بەڕێوەبەری گشتیی دەستەی داواكانی موڵكداری وتی، بە ئامانجی قەرەبووكردنەوەی ئەو 47 كەسە، بڕی 501 ملیۆن دینار لە بەغدادەوە گەیشتووەتە هەرێم و سبەینێ و دوو سبەی پارەكە بەسەر ئەو هاوڵاتییانەدا دابەشدەكرێت و قەرەبوویان دەكەنەوە، پرۆسەكەش بەردەوامدەبێت.
