بەڕێوەبەرایەتیی گشتیی بەرەنگاربوونەوەی توندوتیژی دژی ئافرەتان و خێزان لە هەولێر ئاشکرایکردووە، دایکێک “بەشێوەیەکی دڕندانە” ئەشکەنجەی منداڵەکانی داوە کە تەمەنیان لەخوار یەک ساڵەوەیە و ئێستا دایکەکە دەستگیرکراوە.
بەپێی ڕاگەیەندراوی بەڕێوەبەرایەتییەکە، لەلایەن هەواڵدەرێکەوە ئاگادارکراونەتەوە لەوەی حاڵەتێکی ئەشکەنجەدان کە دایکێک منداڵە خوار یەک ساڵەکانی بەشێوازێکی “زۆر دڕندانە” ئەشکەنجە دەدات.
ئاماژەی بەوەکردووە، دوای ئەوەی لە ڕووداوکە دڵنیابوونەتەوە و بەڵگەی ڤیدیۆیی ئەشکەنجەدانەکەیان دەستکەوتووە، دایک و منداڵەکانی براونەتە بەڕێوەبەرایەتییەکەیان و ڕێکاری یاسایی بەرامبەر گیراوەتەبەر.
جەختکراوەتەوە لەوەی، لە بەڕێوەبەرایەتیی بەرەنگاربوونەوەی توندوتیژی دژی ئافرەتان و خێزان وێنە و ڤیدیۆکان خراونەتە بەردەم دادوەر و لایان پارێزراوە.
داواشدەکات، لەبوونی حاڵەتی لەوشێوەیەدا لەڕێگەی هێڵی گەرمی (199)وە ئاگاداریان بکەنەوە.
