وەزارەتی ئاو ئاشکرایکرد، کە عێراق لەبەردەم قەیرانێکی کەمئاویدایە خراپترین قەیرانە لە مێژووی وڵاتەکەدا، بەهۆی گۆڕانکارییەکانی ئاووهەوا و ئەو کێشانەی تورکیا و ئێران بۆیان دروستکردووە.
وتەبێژی فەرمیی وەزارەتی ئاوی عێراق عەون زیاب ڕایگەیاند، عێراق لەبەردەم قەیرانێکی سەختی کەمئاویدایە کە لە مێژوودا هاوشێوەی نەبووە، هۆکارەکەشی بەرزبوونەوەی پلەکانی گەرما و کەمبارانییە بەڕێژەی 30%ی تێکڕای باران بارینی ساڵانە، هەروەها کەمکردنەوەی سەرچاوەکانی دیجلە و فورات لەلایەن تورکیا و ئێرانەوە.
جەختیشیکردووەتەوە کە ئەو بڕە ئاوە گلدراوەی ئێستا عێراق هەیەتی بەشی پڕکردنەوەی پێداویستییەکانی وڵات دەکات تەنها بۆ ئەم وەرزە.
لە مانگی ئازاری ڕابردوودا نەتەوە یەکگرتووەکان هۆشداریدا لەوەی ئاوی دیجلە و فورات بەڕێژەی 73% کەمبووەتەوە.
نەتەوە یەکگرتووەکان وتوویەتی، ئێران و تورکیا بەشێوەیەکی بەرفراوان پرۆژەکانیان لەسەر سەرچاوەکانی دیجلە و فورات فراوان دەکەن بەبێئەوەی گوێبدەن بە پێداویستییەکانی عێراق، داواشی لە هەرسێ وڵاتەکە کردووە لەوبارەیەوە هەماهەنگی بکەن.
