چەند چەكدارێك بە چەكەوە هێرشیانكردەسەر هاوڵاتییەك و زیاتر لە 350 هەزار دۆلاریان لێسەند و هەڵاتن.
فەرماندەیی پۆلیسی پارێزگای بەسڕە ئاشكرایكرد، ئێوارەی ئەمڕۆ چوارشەممە چەند چەكدارێك كە ئۆتۆمبێلێكی پیكابیان پێبووە، لەسەر ڕێگایەكی گشتیی پارێزگاكە پەلاماری هاوڵاتییەكیان داوە و بە زەبری چەك و ترساندن 350 هەزار دۆلار و هەشت ملیۆن دیناری هاوڵاتییەكەیان دزیوە.
بەپێی پۆلیسی پارێزگای بەسڕە، دزیكردنەكە لەسەر ڕێگای گشتیی بەسڕە – ئوم قەسڕ كراوە و هاوڵاتییەكە بەڕێگاوە بووە بەرەو بەندەری ئوم قەسڕ، چەكدارەكان پارەكانیان دزیوە و هاوڵاتییەكەیان ئازادكردووە و هەڵاتوون.
چەند ڕۆژێك لەمەوبەر لە بەسڕە ژمارەیەك چەكدار هەڵیانكوتایەسەر نووسینگەیەكی دابەشكردنی مووچە و پێشانگەیەكی ئۆتۆمبێل و سێ قاسەی پارەیان دزی.
هەر لەم هەفتەیەدا چەكدارەكان بە چەكەوە هەڵیانكوتایەسەر تانكەرێكی گواستنەوەی سووتەمەنی لەسەر ڕێگای بەسڕە – ئوم قەسڕ و دزییان.
