ڕاپۆرتێكی نوێ لەبارەی ڕادەی پارێزراویی ئامێری مۆبایلی ئایفۆن لە هاككردن زانیاریی نوێ ئاشكرادەكات.
پسپۆڕانی ئاسایشی سیبریانی لە ئەڵمانیا، بەدواداچوونێكیان كردووە و ئەنجامەكەی لە ماڵپەڕی ” Tech Radar”دا بڵاوكراوەتەوە و دەڵێت، ئەو كاتەی پەیوەستی تۆڕی پەیوەندیكردن و ئینتەرنێت نییە و تەنانەت بە كوژاوەییش، ئامێری مۆبایلی ئایفۆن هاكدەكرێت.
تاقیكردنەوەكە لە زانكۆی تەكنەلۆجیی دارمشتاتی ئەڵمانیا كراوە و ئاشكرایكردووە، لە كاتی كارپێكردنی ئامێری ئایفۆن بە دۆخی بەكارهێنانی وزەی كەم، هاككەران دەتوانن هێرشەكانیان بۆ سەر ئامێرەكە دەستپێبكەن و پرۆگرام و بابەتی زیانبەخشی بۆ بنێرن.
دۆخی بەكارهێنانی وزەی كەم، وادەكات چەندین خزمەتگوزاریی ئامێری مۆبایلی زیرەك وەك بلوتووس و پەیوەندیكردن لە نزیكەوە، تەنانەت لە كاتی كوژاندنەوەی مۆبایلەكە یاخود بەتاڵبوونەوەی وزەی پاترییەكەی كاربكەن و بەوەش هاككەران دەتوانن مۆبایلەكان هاكبكەن، وەك ڕاپۆرتە ئەڵمانییەكە پێیگەیشتووە.
