جایر بۆلسۆنارۆ سەرۆکی بەرازیل بە توندی وەڵامی لیۆناردۆ دیکاپریۆی دایەوە، پاش ئەوەی ئەستێرەکەی سینەمای ئەمریکی داوایکرد پارێزگاری لە دارستانەکانی ئەمازۆن بکرێت.
بەپێی تۆڕی “سی ئێن ئێن”، بۆلسۆنارۆ لە بەردەم کۆشکی سەرۆکایەتیی “ئەلفۆرادا”دا گوتوویەتی، باشتر وایە “دیکاپریۆ دەمی دابخات”.
ئەمە لەکاتێکدایە چالاکوانانی ژینگە، سەرۆکی بەرازیلی سەربە بەرەی ڕاست تۆمەتباردەکەن، بەوەی گوێ بە کەشوهەوا و ژینگە نادات و لە ماوەی دەسەڵاتی ئەودا بارودۆخی دارستانەکانی ئەمازۆن خراپتر بووە.
ئەم وەڵامەی سەرۆکی بەرازیل پاش زنجیرە تویتێکی لیۆناردۆ دیکاپریۆ دێت، تێیاندا داوای لە گەنجانی بەرازیل کردووە لە هەڵبژاردنەکانی ئۆکتۆبەری داهاتوودا دەنگیان بەو پاڵێوراوانە بدەن کە پشتگیری پاراستنی ژینگە و دارستانەکانی ئەمازۆنن.
سەبارەت بە پرسی ژینگە و دارستانەکانی ئەمازۆن، دیکاپریۆ جەختیکردبووەوە، “ئەوەی لەوێ ڕوودەدات، بۆ هەموومان گرنگە”.
