لەم وەرزەدا کەریم بنزیمەی فەرەنسی ئاستێکی خەیاڵیی پێشکەش کردووە، هۆکاری سەرەکی بووە بۆ گەیشتنی یانەی ڕیاڵ مەدرید بە یاریی کۆتایی چامپیۆنزلیگ.
بەپێی داتا و ئامارەکانی (ئۆپتا)، کەریمی فەرەنسی تاوەکوو ئێستا لە خولی یانە پاڵەوانەکانی ئەوروپا 15 گۆڵی تۆمار کردووە، بە تۆمارکردنی دوو گۆڵی دیکە ڕێژەکە بۆ 17 گۆڵ لە یەک وەرزدا بەرز دەکاتەوە، بەو ژمارەیەشەوە لەگەڵ ڕیکۆردی پێشووی کریستیانۆ ڕۆناڵدۆ وەک خاوەن زۆرترین گۆڵ لە یەک وەرزی چامپیۆنزلیگ هاوتا دەبێتەوە.
کریستیانۆ لە وەرزی 2013/2014 توانیویەتی بە درێسی ڕیاڵەوە 17 گۆڵ لە خولی یانە پاڵەوانەکان تۆمار بکات، کە بەرزترین ڕێژەیە یاریزانێک لە یەک وەرزی خولە ئەوروپییەکەدا تۆماری دەکات.
بنزیمە بە 15 گۆڵەوە خەڵاتی گۆڵکاری چامپیۆنزلیگیشی یەکلایی کردووەتەوە، بەو پێیەی نزیکترین ڕکابەرەکانی ڕۆبێرت لیڤاندۆڤسکی و کریستیان هالەرن لە یانەکانی بایرن میونشن و ئەیاکس ئەمستەردام (13 بە 11 گۆڵ)، هەر دوو یاریزانەکەش ماڵئاوایییان لە خولەکە کردووە.
