هونەرمەند هۆشەنگ کامکار لە ڕۆژی شاری سنەدا پیرۆزبایی لە هاوشارییانی دەکات و دەنووسێت، ژیان، کردەوە، خوو و بەرهەمەکانیشیان لەژێر کاریگەریی ئەو شارەدایە، “شەشی گوڵان لە مێژوودا ناونراوە بەناوی سنە”.
هۆشەنگ کامکار بۆ ڕۆژی سنە بەناونیشانی “سنە، شاری موسیقا، شاری ئێمە” نووسیویەتی، “ئەو شارە ڕەنگدانەوەی لەسەر بیر و هزری ئێمە هەبووە”، “وەها لەیادماندا زیندوو ماوە وەک بۆنی باوەشی دایکمان ئەدا”.
دەقی نووسینەکەی هونەرمەند هۆشەنگ کامکار:
سنە، شاری موسیقا، شاری ئێمە
ژیان، کردەوە، خوو و بەرهەمەکانی ئێمەی کامکارەکان، وەک بەرهەمگەلی باقیی مرۆڤەکان، لە ژێر کاریگەریی ئەو باژێڕە دایە کە تیا گەورەبووە.
سنە، ئەو شارەیە کە ئێمە مناڵی و مێرمنداڵیمان لە سرووشتی جوان و لە تەک خەڵکە هونەردۆست و لێهاتووەکەیدا بەسەربردوە. ئەو شارەیە کە ڕەنگدانەوەی فرەی لەسەر بیر و هزری ئێمەدا بووە. ئەو شارەیە کە جوانیی بەهارانی ئاویەرەکەی، وەها لە یادمانا زینگ ماگە وەک بۆنی باوەشی دایکمان ئەدا.
ئێمە، لە گشت بەرنامەکانمان‌دا، بە شانازیەوە بۆ جوانی و شکۆی نیشتمانمان گۆرانیمان وتووە و نەک تەنیا لە بەرهەمە فۆلکلۆرەکان‌دا، بەڵکوو لە فرەیەک لە بەرهەمگەلی سەمفۆنیکی من و ئەرسەلانیش‌دا، بەردەوام شوێنپێی موسیقای زێدمان و موتیفگەلی فەرهەنگیی ئەو هەرێمە دیارە. بۆ وێنە بەهارانی ئاویەر، سەمفۆنیی هەڵەبجە، ئەفسانەگەلی زێدی باوکی و کوردستان خۆشە.
شەشی گوڵان لە ڕۆژمێردا، ناونراوە بە ناوی سنە.
ڕۆژی شاری موسیقا.
بۆیە ئەم یادە لە کانی دڵەوە لە گشت هاوشارییانی ئازیزم پیرۆزبایی ئەکەم و هیواخوازم یادە جوانەکانی ئەو دیارە، لە دڵیان‌دا، هەرمان بێ.
بە ئاواتی سەربەرزی و سەرکەوتن.
