ئێران و سعودیە لە عێراق لەسەر 10 خاڵ ڕێككەوتن، یەكێكیان ڕاگرتنی شەڕە لە یەمەن.
فوئاد حسێن وەزیری دەرەوەی عێراق ڕایگەیاند، سعودیە و ئێران لە بەغداد كۆبوونەتەوە و كۆبوونەوەكە ئەمنی بووە و هەردوولا گەیشتوون بە یاداشتێكی لێكتێگەیشتن كە لە 10 خاڵ پێكدێت.
وتیشی، هەردوو وڵاتەكە ڕێككەوتن لەسەر ڕاگرتنی شەڕ لە یەمەن و ڕێككەوتوون گەڕی دووەمی گفتوگۆ لەسەر ئاستی دیپلۆماسی بێت.
هاوكاتی وتەكانی وەزیری دەرەوەی عێراق، مەحمود عەباس زادە وتەبێژی لیژنەی ئاسایشی نەتەوەیی و سیاسەتی دەرەوە لە پەرلەمانی ئێران ڕایگەیاند، گفتوگۆكانی بەغدادی ئێران و سعودیە زۆر ئەرێنی و بنیادنەرن.
عەباس زادە جەختیكردەوە كە بەهێزكردنی پەیوەندیی نێوان ئێران و سعودیە كاریگەریی سیاسی و ئابوری و كەلتووریی لەسەر گەلانی ناوچەكە دەبێت و ئەوەش هەمان ئەو ئامانجەیە كە عێراق هەوڵی بۆ دەدات.
