گروپی سیتی بۆ تۆپی پێ، یانەی ژمارە 11ی لە سەرانسەری جیهان و ژمارە پێنجی لە کیشوەری ئەوروپا کڕی، “سیتی گروپ” گروپێکی وەرزشیی تایبەت بە تۆپی پێیە و خاوەندارێتییەکەی بۆ شێخ مەنسوور بن زایدی وەزیری دەولەی ئیمارات دەگەڕێتەوە، یەکێک لە یانەکانی سیتی گروپ بریتییە لە یانەی مانچستەر سیتی کە یەکێکە لە بەهێزترینەکانی ئەوروپا و جیهان.
لە نوێترین هەوڵیاندا توانییان یانەی “ئێن ئەی سی بریدا”ی هۆڵەندی بکڕن، کە یەکێکە لە یانە بەشدارەکان لە خوولی هۆڵەندا.
لەو بارەیەوە خاوەندارێتیی “ئێن ئەی سی بریدا” ڕاگەیەندراوێکی بڵاوکردووەتەوە، تیایدا هاتووە، “لەسەر پەیڕەوەی بنەماکانمان و نزیکبوونمان لە سیتی گروپ، فرۆشتنی پشکەکانمان بە سیتی گروپ هەڵبژارد، هەموو ئەو لایەنە کڕیارانەی دیکە ئاگادارکراونەتەوە و سوپاسی هەوڵەکانیان دەکەین”.
سیتی گروپ خاوەنی یانەکانی مان سیتی، جیرۆنا، تروا، لۆمێلە لە ئەوروپا، هەروەها شەش یانەی دیکە لە ئەمریکای لاتین و ئوسترالیا و ژاپۆن و چین و هندستان.
