تەنها لە ماوەی 48 كاتژمێردا، نزیكەی 1100 بومەلەرزە لە دوورگەیەكی زەریای ئەتڵەنتیك-یان داوە.
بومەلەرزەكان لە دوورگەی “ساو خۆرخێ” ڕوویانداوە كە دوورگەیەكی گڕكانییە و دەكەوێتە ناوەڕاستی زەریای ئەتڵەنتیكەوە. ڕۆی ماركیز سەرۆكی ناوەندی چاودێریكردنی چالاكیی زەمینلەرزەی گڕكانی لە ناوچەی ئەرخەپیل لە دوورگەكانی ئەزۆر دەڵێت، “گوڕی بومەلەرزەكان لەنێوان 1.9 بۆ 3.3دا بوون و لە نیوەڕۆی ڕۆژی شەممەی ڕابردووەوە دەستیانپێكردووە و لە ماوەی 48 كاتژمێردا ژمارەیان گەیشتووەتە نزیكەی 1100 بومەلەرزە”.
بەپێی وتەی ڕۆی ماركیز كە لێدوانی بۆ ڕۆیتەرز داوە، بومەلەرزەكان نەبوونەتەهۆی تەقینەوەی گڕكانە كە دوایین جار ساڵی 1808 تەقیوەتەوە و ئاگر و تواوەی كانزای لێدەرپەڕیون.
ژمارەی دانیشتووانی ساو خۆرخێ نزیكەی 8400 كەسن و دوورگەكە بەشێكی سەرەكیی “ئەرخەپیل”ـە كە لە نۆ دوورگە پێكدێت و یەكێكە لە ناوچە گەشتیارییەكانی جیهان.
