ڕۆژی هەینی، پاشماوەی مووشەکێکی چینی، خۆی دەکێشێت بە مانگدا، بەڵام ڕووداوەکە بە شێوەیەکی ڕاستەوخۆ چاودێری نەکراوە، بۆیە لایەنە پەیوەندیدارەکان هێشتا هیچ وێنەیەکی ڕووداوەکەیان نییە.
زاناکان باس لەوە دەکەن، دوێنێ شەو کاتژمێر 3:25 پاشماوەی موشەکێک کە لە بۆشایی ئاسماندا مابووەوە، بەر مانگ کەوتووە، گەرچی هێشتا ئەم ڕووداوە لە لایەنە ڕەسمییەکانەوە پشتڕاست نەکراوەتەوە.
بە پێی ڕوونکردنەوەیەکی بێل گرەی زانای گەردوونناسی، کە یەکەمین کەسە ئەم ڕووداوەی ئاشکرا کردبێت، پاشماوەی مووشەکەکە بەر دیوە تاریکەکەی مانگ کەوتووە، هەروەها خێراییەکەی 9 هەزار کیلۆمەتر بووە، وا پێشبینی دەکرێت کە بەرکەوتنەکەی لەگەڵ مانگدا چاڵێکی دروستکردبێت، کە تیرەکەی 10 تا 20 مەتر بێت.
سەبارەت بەو لایەنەی خاوەنی ئەم تەنە ئاسمانییەیە، مشتومڕێکی زۆر هاتە ئاراوە، بەڵام دواتر دەرکەوت کە ئەم تەنەی بەر مانگ کەوتووە، پاشماوەی مووشەکێکی چینییە بە ناوی “لۆنگ مارش”، کە لە ساڵی 2014دا هەڵدرا.
ئەمە لە کاتێکدایە مشتومڕێکی زۆر لەبارەی خاشاکە ئاسمانییەکان و ئەو هەموو پاشماوەی مووشەک و ڕۆکێتانە هەیە، کە بە بۆشایی ئاسماندا دەسووڕێنەوە و هیچ ڕێگەچارەیەک بۆ کۆکردنەوە یان ڕیکخستنەوەیان نییە.
