نرخی نەوت ئەمڕۆ هەینی بۆ خوار 100 دۆلار دابەزی، دوای بەرزبوونەوەیەکی زۆری نرخەکەی، هۆکارەکەشی بۆئەوە دەگەڕێتەوە سزاکانی وڵاتانی ئەوروپا و ئەمریکا بۆسەر ڕوسیا کەرتی وزەی نەگرتووەتەوە.
دوێنێ پێنجشەممە بەهۆی مەترسییەکانی سەپاندنی سزا بەسەر ڕوسیا کە یەکێکە لە سەرەکیترین هەناردەکارانی نەوت، نرخی نەوت بۆ سەروو 100 دۆلار بەرزبووەوە.
ئەمڕۆ نرخی یەک بەرمیل نەوتی خاوی برێنت لەبازاڕەکانی جیهان بۆ 97.56 دۆلار دابەزی، بەبڕی 1.52 دۆلار و ڕێژەی 1.40% نرخەکەی هاتەخوارەوە.
هەروەها نرخی یەک بەرمیل خاوی تەکساس بۆ 92.31 دۆلار دابەزی و بەبڕی 0.5 سەنت و ڕێژەی 0.57% نرخەکەی هاتەخوارەوە.
بەهۆی هێرشی ڕوسیا بۆسەر ئۆکرانیا دوێنێ پێنجشەممە لەکاتی داخستنی بازاڕی نەوتدا نرخی بەرمیلێک نەوتی برێنت لە 105 دۆلار نزیکبووەوە.
هێرشی ڕوسیا بۆ سەر ئۆکرانیا لە ئەوروپا بە گەورەترین ئاڵۆزی دادەنرێت لەدوای جەنگی جیهانیی دووەمەوە لەو ناوچەیە، کە دەبێتە هۆی ئاوارەبوونی هەزاران کەس.
لە کاردانەوەی ئەو هێرشەی روسیا هەریەکە لە ئەمریکا و بەشێک لە وڵاتانی ئەوروپا سزای توندیان بەسەر روسیادا سەپاندووە و لەنوێترینیشیاندا سڕکردنی سەرجەم موڵک و سامانی ڤلادیمێر پوتین و سێرگی لاڤرۆڤە.
بەڵام سزا بڕیارلێدراوەکانی سەر روسیا تائێستا کەرتی وزەی ئەو وڵاتەی نەگرتووەتەوە و هەرجەندە بەپێی پێشبینیی چاودێران کەرتی نەوت و گازی ئەو وڵاتە یەکێکە لە ئاماجی داهاتووی سزاکان ئەگەر ڕوسیا دەستهەڵنەگرێت لە هێرشەکانی.
