نووسینگەی میدیایی شێخ جەعفەر شێخ مستەفا جێگری سەرۆکی هەرێمی كوردستان، ڕوونكردنەوەیەكی لەبارەی ئەو خانووانەی ئەمڕۆ لە هەولێر كارەبای سەرپێچییان بڕا، بڵاوكردەوە و دەڵێت، “خانووەكان سەر بە وەزارەتی پێشمەرگەن و پەیوەندییان بە جێگری سەرۆكی هەرێمەوە نییە”.
ئەمڕۆ ژمارەیەك خانوو لەلایەن تیمەکانی بڕینی کارەبای سەرپێچییەوە لە شاری هەولێر کارەباکەیان بڕدرا، لە بەشێك لە تۆڕە كۆمەڵایەتییەكاندا وابڵاوكرایەوە كە لەنێویاندا خانووی شێخ جەعفەر شێخ مستەفا جێگری سەرۆكی هەرێمی كوردستان هەیە، بەڵام نووسینگەی میدیایی ناوبراو ڕەتیدەكاتەوە.
لە ڕوونكردنەوەیەكدا نووسینگەی میدیایی جێگری سەرۆکی هەرێم دەڵێت، “بەپێی ڕوونکرنەوەیەک لە قائیقامییەتی قەزای ناوەندی هەولێرەوە، ئەو هەواڵەی کە ئەمڕۆ لە کۆمەڵێک پەیچی ناو فەیسبووک بڵاوکراوەتەوە، کە خانووەکەی بەڕێز شێخ جەعفەر شێخ مستەفا، جێگری سەرۆکی هەرێم کارەبای سەرپێچی ڕاکێشاوە و لەلایەن تیمەکانی بڕینی کارەبای سەرپێچییەوە کارەباکەیان بڕدراوە، دوورە لە ڕاستییەوە و هیچ پەیوەندییەکی بە بەڕێزیانەوە نییە”.
بەپێی ڕوونكردنەوەكە، “خانووەکان سەر بە وەزارەتی پێشمەرگەن و جێگری سەرۆکی هەرێم لە ساڵی (2014)ـەوە لەم خانووانە بەرپرسیار نییە”.
دەقی ڕوونكردنەوەكە:-
ڕوونکردنەوەیەک لە نووسینگەی میدیایی جێگری سەرۆکی هەرێم
بەپێی ڕوونکرنەوەیەک لە قائیقامییەتی قەزای ناوەندی هەولێرەوە، ئەو هەواڵەی کە ئەمڕۆ لە کۆمەڵێک پەیچی ناو فەیسبووک بڵاوکراوەتەوە، کە خانووەکەی بەڕێز شێخ جەعفەر شێخ مستەفا، جێگری سەرۆکی هەرێم کارەبای سەرپێچی ڕاکێشاوە و لەلایەن تیمەکانی بڕینی کارەبای سەرپێچییەوە کارەباکەیان بڕدراوە، دوورە لە ڕاستییەوە و هیچ پەیوەندییەکی بە بەڕێزیانەوە نییە.
بەڵکو خانووەکان سەر بە وەزارەتی پێشمەرگەن، بۆیە ئێمە سەرلەبەری ئەو تۆمەتانە ڕەتدەکەینەوە و بەڕێز جێگری سەرۆک لە ساڵی (2014)ەوە لەم خانووانە بەرپرسیار نییە، بەڵکو سەر بە وەزارەتی پێشمەرگەن.
نووسینگەی میدیایی جێگری سەرۆکی هەرێم
14/2/2022
